Accessibility links

шимбә, 3 декабрь 2016, Казан вакыты 05:35

Ukraina parlamentı taratıluğa qarşı: bäysezlek mäydanında yañadan xalıq cıyıla


2 april könne Ukraina prezidentı Viktor Yuçenko, Yuğarı Rada – parlamentnı taratıp 27 mayda yaña saylawlar uzdıru turındağı färmanğa qul quydı. Küpçelek Regionnar partiäse deputatlarınnan torğan parlament prezidentnıñ bu qararın ütäwdän baş tarttı. Kievnıñ bäysezlek mäydanı yañadan xalıq belän tuldı.

Parlamentnı taratu turındağı qararın prezident Yuçenko üz burıçı dip sanadı, häm ildä wazğiät tınıç, dip belderde:

"Min bolarnı däwlätebez, bäysezlek, territorial berlek, Ukraina konstutusiäsen saqlaw, xalıqnıñ irekleklären häm xoquqların yaqlaw öçen eşlädem. Bu minem xoquqım ğına tügel, bu minem burıçım."

Yuçenko häm Yanukoviç 2004nçe yılda prezident saylawlarında köndäşlek itte. Ciñüne Yanukoviç yawladı, ämma meñlägän keşe şul mäşhür bäysezlek mäydanına çığıp saylawlar näticäsenä qarşılıq belderde. Yaña tawış birü oyıştırıldı, häm Ukrainada xakimiät almaşu tarixqa "äflisün inqilabı" iseme belän kerep qaldı. Soñıraq Rusiä yaqlı Yanukoviç parlamentta koalisiä qoruğa ireşte häm Yuçenko anı premyer-ministr itep bilgeläde. Yuçenko Yanukoviçnı deputatlarnı üz yağına tartuda ğäyepläp çıqtı. Ägär dä Yanukoviç koalisiäse Yuğarı Radada 450 yrınnıñ 300zen alsa, alar prezidentnıñ färmannarın ütämäw xoquqın alaçaq. Bügenge köndä Radada 450 deputatnıñ 239zı Yanukoviç yaqlı.

Parlament başlığı Olexandr Moroz, parlamentnı taratırğa ber säbäp tä yuq, dip belderde:

"Yuğarı Rada, demokratik tawış birüdä xalıq tarafınnan saylanğan, Ukraina häm xalıqara cämäğätçelek tarafınnan tanılğan bu parlamentnı taratuğa ber qanuni säbäp tä yuq, dip sanıy."

Radadağı kommunistlar fraksiäse başlığı Petro Simonenko kiçä ük, parlamentnı taratu legal bulmayaçaq, dip beldergän ide.

Xärbilär kem yağında?

Saqlanu ministrı Anatoly Hrytsenko, ğaskärlär – prezident yağında bulırğa tieş, dip belderde:

"Qanun nigezendä xärbilär barı tik ştab başlığı Yuçenko färmannarın ütiäçäk."

Kiçä kiç Kiev üzägendä xalıq cıyıldı. Qırımnan Kievqa Aqmäçet häm Aluşta şähärlärennän kilälär, mäğlüm bulğança anda küpçelek premyer-ministr Viktor Yanukoviçnıñ Regionnar firqase yaqlı.

Yuçenko tarafınnan premyer-ministr wazifasınnan alınğan Yulia Tymoşenko uram cıyını waqıtında parlamentnı taratu färmanın xuplawın belderde:

"Rişwätçelek oyasına äylängän, xalıqqa saylaw mömkinlege birmi başlağan Yuğarı Rada monnan soñ üz eşen däwam itä almıy. Totrıqlılıq ul – prezident färmannarın ütäw, qanun xakimiäten saqlaw, ğadel näticälär biräçäk saylawlarğa äzerlänü."

Söyläşülär bügen dä däwam itte. Regionnar firqase deputatları– saylawlar 2011nçe yılda ğına bulaçaq, parlament üz eşen däwam itäçäk, dip belderde.

Alsu Qormaş
XS
SM
MD
LG