Accessibility links

шимбә, 3 декабрь 2016, Казан вакыты 05:38

Iran uzğan atnada totqarlağan britan xärbi diñgezçelären cibäräçägen iğlan itte


Berniçä säğät elek İran prezidentı Mäxmüt Äxmädinecad uzğan atnada totqarlağan britan xärbi diñgezçelären yarlıqap alarnı azat itäçägen belderde. Ul monı Tähranda uzğan matbuğat oçraşuında xäbär itte. Aña qädär ul, İran berkemgä dä üz çiklären bozuğa yul quymayaçaq, dip äytkän ide.

15 britan xärbi diñgezçese İran su bilämälären bozuda ğäyeplänep martnıñ 23-endä totqarlanğan ide. Bu şaqtıy kierenke xalıqara krizisqa kiterde, çönki Britaniä üz xärbiläreneñ İran çiklären bozmawı, alarnıñ kürşe Ğiraq sularında totqarlanuın alğa sörep, Tähran ğämällären xalıqara qanunnı bozu oçrağı dip bäyäläde. İran isä üz yağınnan, totqarlanğan britannarnıñ İran çiklären ütep kerülären tanunı videoğa töşerep, anı bar dönyağa tarattı.

İran belän Britaniä arasındağı kierenkelek şulay itep tiz genä çişelmäs kebek ide, ämma çärşämbe kiçen kötelmägän üzgäreş buldı - Tähranda uzğan matbuğat oçraşuında İran prezidentı Mäxmüt Äxmädinecad, islam dönyasınıñ äle genä Mäwlet kiçen bäyräm itüe uñayınnan britan xalqına üzençä büläk yasawın äytte:

"İran yağında şuşı 15 keşene cawapqa tartu xoquqı häm qödräte buluına basım yasap, min alay da İran xalqınıñ häm xökümäteneñ alarnı yarlıqawı häm britan xalqına alarnı azat itü täqdimen yasawı xaqında iğlan itäm", di prezident Mäxmüt Äxmädinecad.

Şul uq matbuğat oçraşuında Äxmädinecad, äle şuşı belderüenä qädär, İran berkemgä dä üz çiklären bozuğa yul quymayaçaq dip äytkän ide. Ä inde Londonnıñ Tähran ğämälen tikşerügä İminlek Şurası qaramağına çığaruın İran prezidentı ğomumän, "suğış ğämäle" dip bäyäläde.

Şaqtıy ozaqqa suzılğan matbuğat oçraşuı barışında Äxmädinecad Quşma Ştatlarnıñ 2003-nçe yılda Ğiraqqa basıp kerüen, monıñ, anıñ süzlärenä qarağanda, yalğanğa nigezlänep, yäğni Ğiraqta küpläp üterü qoralları bar digän bulıp eşläwen dä telgä aldı. Giraqta inde saylanğan xökümät bulsa da, ildä haman da basqın köçlär qala birä häm ğadi keşelär ülä tora, dide prezident Äxmädinecad.

İrannıñ Könbatış belän araları soñğı waqıtlarda bolay da naçar ide, anıñ atom programması mäs''äläse inde Berläşkän Millätlärneñ İminlek Şurasında qarala, häm Şura Tähranğa qarşı yaña çikläwlär dä kertkän ide. Britan diñgezçelären totqarlaw şul qatlawlı mizgelgä turı kilde.

İrannıñ, britannar çınnan da ilneñ çigen bozdı, alarnı totqarlaw qanuni ide digän qaraştan waz kiçmäwen kürsätep Äxmädinecad, britan diñgezçelären totqarlağan İran xärbilärenä yuğarı däwlät büläkläre birelüen xäbär itte.

Kärim Kamal
XS
SM
MD
LG