Accessibility links

шимбә, 10 декабрь 2016, Казан вакыты 06:17

Tatarstan militsiäse ber tonna äfyün qulğa töşerde


Andıy külämdäge äf'yunne Rusiädä soñğı ber-ike yılda qulğa töşerü bulmağan. Kem belä, ä bälki bu yulı da Qazaqstanda citeşterelep böten Rusiägä taraluçı ağu xucaları äkren genä üz eşen däwam itär ide. Tatarstan militsiä xezmätkärläreneñ bik töpçenep eşläwe arqasında cinayätçelär yıraq kitä almağan.

Bu tarixnıñ başı näq mart urtasına turı kilä. Qazan-Mäskäw yulında Tatarstan militsiä xezmätkärläre ber inomarkanı tuqtatıp, tikşerü uzdıra. Maşinada irle-xatınlı Qazaqstan keşeläre bula. Alarnı tikşerü näticäsendä xezmätkärlär 100 kilo gaşiş tabalar. Andıy külämdä gaşişnı Tatarstanda qulğa töşerü moñarçı bulmağan da. Tik bu tarixnıñ başı ğına bula.

Totılğan qazaqstanlılar xalıqara cinayätçe törkemeneñ wäkilläre bulıp çığa. Ä alar kitergän äf'yun Qazaqstannıñ Çuysk üzänlegendä citeşterelä. Monnan soñ alarnı Altay kraenda cir astında qaçırıp totalar häm äkrenläp Rusiäneñ törle töbäklärenä häm Baltıyk buyına ozatalar. Xalıqara cinayätçelärne totqarlaw öçen operatsiägä Rusiä häm Altay eçke eşlär ministrlığı xezmätkärläre dä quşıla. Tatarstan xoquqçıları narkodilerlar bulıp, cinayätçelärdän 800 kilo marixuana satıp alu turında süz quyışa. Monıñ öçen xoquqçılar 8mln sum aqça biräbez dilär. Äf'yun yulın oyıştıruçı Bogdad Tüläübäkov mondıy ere kileşügä bik şatlana häm taşlama da yasarğa wäğdä itä. Ämma xoquq yaqlawçılar tarafınnan bernindi taşlamalar da bulmıy.

Alar Altay kraenıñ Kulundin rayonı yanındağı dalada oçraşırğa süz quyışalar. Narkodilerlar atlarğa utırıp kilä, alar arasında Bogdad Tuläübäkov ta bula. Cinayätçelär aqça alıp, ber kirtäsez genä dala aşa Qazaqstanğa qaytırğa niätli. Ämma plannarı tormışqa aşmıy. Alar aqçalarnı alıp, äf'yunne kürsätä. Häm şunıñ belän xalıqara cinayätçe törkemeneñ eşçänlege faş itelä.

Ber tonnağa yaqın narkotiknı Qazanğa kiterälär. Alarnıñ bäyäse 40mln sumnan da kim tügel. Cinayätçelärne dä - Qazaqstannıñ dürt watandaşın häm ike rusiälene Tatarstan başqalasına alıp kilälär. Alarğa qarata cinayät eşe quzğatıla. Ä Tatarstan xoquqçıların yaqın arada däwlät büläkläre kötä.

Al'bina Zäynulla

XS
SM
MD
LG