Accessibility links

пәнҗешәмбе, 8 декабрь 2016, Казан вакыты 23:10

Nadia M. Diuk: çın federasiä qısalarında ğömer itü töbäklär öçen märtäbäle bula


Könbatış soñğı waqıtlarda Rusiädä keşe xoquqları torışı naçarlana dip söyli. Töp dälillär arasında - xökümättän bäysez oyışmalar eşen çiklägän qanun, Rusiädä töbäklär xoquqların kimetü. Rusiäneñ keşe xoquqları wäkile Vladimir Lukin üzeneñ yıllıq xisabında keşe xoquqları ölkäsendä wazğiät yaxşıra, dip belderde. Ämma ul xisapta kübräk sosial ölkä telgä alınğan.

Bu atnada Vladimir Lukin ildä keşe xoquqları torışı turındağı xisabın prezident Vladimir Putinğa täqdim itte, soñıraq jurnalistlar belän oçraştı. Lukinğa kön sayın 300läp şikäyät ğarizası kilä ikän, alarnıñ yartısınnan kübräge – toraq häm sosial problemalar turında, dide Lukin. Şuña kürä xisapta töp iğtibar näq sosial ölkägä birelgän. Lukinnıñ – törmälär, xärbi büleklärdä xoquq torışı yaxşırdı digän süzlären, keşe xoquqların yaqlawçılar – alardan şikäyätlär azraq kilä, ämma bu – wazğiätneñ yaxşırğanın añlatmıy, dip bäyäläde. Xalıq öçen yış qına demokratiä – yäşäw şartların da añlata.

Tatar teleneñ latin imlasına küçüe turında Tatarstan Däwlät Şurası qabul itkän qanunnı niçä yıl uzğaç Rusiä Däwlät Duması ğämäldän çığardı. Rusiä cirendä kirill xärefläre genä qullanırğa tieş, dielde Duma qanunında. Yevropada İminlek häm Xezmättäşlek Oyışmasında AQŞ wäkile Julie Finley, üzen köçle dip kürsätergä tırışqan däwlätneñ üzendä qurqu xise bar, dip belderde: "Tatarstanğa latinğa küçüne tıyunıñ üzençälege şunda ki, küräseñ xökümät, üzendäge ayırım millätneñ yäki töbäkneñ mädäni mirasın saqlawına räxätlek toymıy. Häm bu Rusiä kebek köçle, yäki üzen köçle itep kürsätergä telägän il öçen – säyer küreneş."

AQŞnıñ tağın ber wäkile, bu yulı inde xökümättän bäysez oyışma, demokratiä waqıfını Yevropa häm Yevraziä belän eşläwçe citäkçese Nadia Diuk, Rusiädä rus bulmağan millätlärgä üzlären säyäsi yaqtan tanıtu awırlaştı, dip sanıy.

"Ägär dä Rusiä – çın federasiä bulsa ide, anıñ qısalarında ğömer itü här töbäk öçen märtäbäle bulır ide. Ämmä kürgänebezçä xäzer Rusiädä säyäsi irekleklär qısıla, elek saylanğan töbäk başlıqları xäzer bilgelänä, millätlär mänfäğätlären yaqlağan köçlärne säyäsätkä yaqın da kitermilär. Qızğanıç, ämma Rusiädä xällär kiregä taba bara."

Alsu Qormaş
XS
SM
MD
LG