Accessibility links

җомга, 9 декабрь 2016, Казан вакыты 22:25

Tatar yäşläre üzäge Sember ölkäseneñ iñ uñğan yegetlären barladı


İldar Usmanov başlanğıçı belän “Aqbars” isemle Yäşlär üzäge açıluı turında xäbär itelgän ide inde. Töp maqsatları – tatar yäşlären berläşterü, alarnı ictimaği häm säyäsi tormışta aktivlaştıru, ğöref-ğadätlärebezne qaytaru, ana telen saqlap qalu çarların kürü.

Oyıştıru cıyılışında Qazan qunaqları da bar ide. Alar, mömkinleklärdän çığıp, yaña oyışmanıñ berençe adımnarına yärdäm dä wäğdä itkännär ide. Häm, “wäğdä – İman” digändäy, üz süzlären ğämäl belän nığıtalar da.

Härxäldä, Sember yäşläreneñ berençe zur çarasın oyıştıruğa da, anı alıp baruğa da qazanlılar zur öleş kerttelär. “Tatar yegete” bäygese “Arbat” isemle Yäşlär yal üzägendä uzdı. Anı Qazan qunaqları - Bötendönya tatar kongressı Başqarma komitetı referentı Räzinä Gıybatdinova häm “İdel” yäşlär üzäge xezmätkäre Marat Maksutov alıp bardılar. Kiçäne Räzinä üz cır-moñnarı belän dä bizäde.

300гә yaqın tamaşaçı aldında Ğazinur Zaitov, İlnar Äxtämov, Ruslan Fätkullov, Radik Fäizov üzläreneñ uñğan, ölger, buldıqlı ikännären kürsätergä tırıştılar.

Ğazinur Zaitov Ul'yanovsk ölkäse İske Qulatqı mäktäbendä uqi. Muzıka belän qızıqsına, gitarada uynıy. Sport törlärennän tennis, voleybol häm basketbolnı yarata.

İlnar Äxtämov İske Qulatqıda tuğan. Bügen Ul'yan däwlät universitetında yuristlıykqa uqi. Buş waqıtların kitap uquğa, islam qanunnarın öyränügä qullana. Bulaçaq tormış iptäşeneñ tatar millätennän buluın teli.

Ruslan Fätkullov Sember şähäreneñ 28 mäktäbendä uqi. Mäktäp külämendä dä, tatar cämäğätçelege oyıştırğan törle çaralarda da aktiv qatnaşa: cırğa osta, şiğriät belän dä mawığa. Tormış qağidäse: «Härwaqıt quyğan maqsatına ireşü».

Radik Fäizov Käşä awılı mäktäbendä uqi. Radiknıñ tormış qağidäse: “Haman da alğa baru”. Sotsialistik xezmät qaharmanı isemenä layıq bulğan babası – anıñ öçen tormış mayağı bulıp tora.

Yegetlär “Ässälämägaleyküm!”, “Milli cäwhärlär kürgäzmäse”, “Xıyalım - aq qanatım” kebek törle bäygelärdä köç sınaştılar.

“İñ milli canlı häm belemle yeget” bulıp Ğazinur Zaitov tabıldı. Monısı ğacäp tä tügel: anıñ ätise Mansur Zaitov küp yıllar buyı İske Qulatqı rayonınıñ mädäniäten äydäwçe bulıp xezmät itte. Kompozitor, talantlı muzıkant häm oyıştıruçı bularaq, üzeneñ sänğät kollektivı belän tatar awılları xalqın milli ruxta tärbiäläwgä dä zur öleş kertä.

“İñ sälätle häm uñğan yeget” isemenä Radik Fäizov layıq dip tabıldı.

İlnar Äxtämov isä “İñ citez häm buldıqlı yeget” ikänlegen kürsätte.

Arada iñ yäşe Ruslan Fätkullov “İñ tapqır häm ziräk yeget” isemen ayuladı.

Çaranıñ töp iğänäçese - İslam awazı” Xäyriä fondı prezidentı İlgiz Nasıybullov. Ul uq jyuri äğzası da. Annan başqa yegetlärneñ sälätlärenä bäya birüçelär arasında avtonomiäse räise Rämis Safin, “Ömet” gäziteneñ baş redaktorı İsxaq Xälimov; 28 nçe mäktäpneñ ana tele uqıtuçısı Aygöl Qaraqaşewa.

İlgiz Nasıybullov yegetlärgä aqçalata büläklär tapşırdı. Tatar yäşläre üzäge citäkçese İldar Usmanov çaranı oyıştıruda oluğ matdi yärdäme öçen İlgiz Nasıybullovqa räxmät süze belän çıqtı. Ä İlgiz äfände isä yäş buınnı tärbiäläwdän dä izgeräk eş yuq, dip, kiläçäktä dä yärdämennän taşlamayaçağın belderde.

Tärbiä buyınça xakimiät tä tırışa kebek. Şähär merı Sergey Yermakov ölkäneñ yäş aktivistları aldında korrupsiä turında leksiä belän çıqtı. Bu citäkçe, yuğisä, ölkä tatarları arasında yuğarı abruyı belän maqtana almıydır. Härxäldä, arxitektura häykäle statusına layıq bulğan mäçet binasın xosusıylaştıruğa fatixa birgän, 1993-yılda, cirne xosusıylaştıru turında qanun yuq çaqta, anıñ äylänä-tirä ciren “daimi qullanışqa” tapşıru turındağı qararğa qul quyğan keşe bit ul. Şul uq waqıtta bu arxitektura häykälen remontlau öçen Mäskäw bülep birgän 500 million aqçanı bülgäläwdä ul da öleşsez qalmağandır inde, dip farazlıy tatar cämäğätçelege.

Mäğärif sisteması da tärbiä buyınça yaña ısullar ezli. Ölkä üzägendä eçkeçelek, narkomaniä, censi toraqsızlıq, SPİD, urlaşu, rişwät turındağı tekstlar buyınça diktantlar yazdıru ğädätkä kerä bara. Mäğärif idäräse üz täcribäse belän başqa töbäklärne dä tanıştırırğa niätli. Faydasına ömetlänälär, küräseñ.

Ayrat İbrahim, Sember

XS
SM
MD
LG