Accessibility links

пәнҗешәмбе, 8 декабрь 2016, Казан вакыты 23:16

Millätne cıyu – daimi “waq” eşlärdän tora


Qazanda 24 martta ütkän Rusiä tatarlarınıñ federal' milli-mädäni möxtäriäte qorıltayındağı çığışlarında Başqortstan delegatları räsmi Ufa häm Qazannıñ üz respublikalarınnan çittä yäşäwçe başqortlarnı häm tatarlarnı cıyu, saqlaw, üsterügä törleçä qarawları turında äytkän idelär. Başqortstan tatarları milli-mädäni möxtäriäte räise Ramil Bignov, mäsälän, Başqortstan citäkçelegeneñ Başqortstannan çittä yäşäwçe başqortlarnıñ üzañın kütärüne däwlät däräcäsendä aktiv räweştä xäl itüläre soqlanuğa layıq dide. Ämma, dide ul, ni säbäpleder Tatarstan üzennän çittä yäşäwçe tatarlar belän bik qızıqsınıp barmıy.

Çınlap ta, 2002 yılğı canisäp aldınnan Başqortstannıñ däwlät köçenä tayanıp eş itä torğan başqort ideologları, canisäp ütkännän soñ, yäğni respublikanıñ eçendä häm tışında tatarlarnı başqortqa äyländerü çarasın uñışlı başqarıp çıqqannan soñ, tınıçlanıp qalmadılar ğına tügel, kiresençä bu yünäleştäge eşlären tağın da aktivlaştırdılar. Perm kraynıñ Barda rayonındağı tatarça söyläşüçe xalıq yanına daimi räweştä respublika byudjetı isäbenä Başqortstannan küpsanlı delegatsiälär cibärelä. Alar anda keşelärgä başqort kitapları öläşälär, cıyınnar qorıp xalıqqa tatar tügel, başqort ikänleklären añlatalar. Başqortstannıñ däwlät televideniese andıy oçraşulardan reportajlarnı qat-qat kürsätü belän mäşgul'. Samara, Çiläbe, Irınbur, Kurgan, Sverdlovsk häm başqa ölkälärdä kabel' televidenise aşa Başqortstannıñ däwlät televidenise tapşıruların kürsätü mäsäläläre dä respublikanıñ räsmi wäkilläre tarafınnan kütärälä, çişelä.

Başqortstannıñ eçendä, digändäy, başqortlıq bayrağı tağın da biegräk kütärelä. Respublikanıñ mäğlümat çaraları, bigräk tä televidenise daimi räweştä Başqortstannıñ Könbatış öleşendä yäşäwçe tatarlarnıñ tatar tügel, başqort ikänleklären “añlatqan” materiallar birä. Şulay, 4 aprel'dä Başqortstannıñ däwlät televidenise Tatarstanğa terälep torğan Yañawıl rayonında ütkärelgän ber şäcärä bäyrämennän reportaj kürsätte. Tapşırudan kürengänçä, ul yaqtağı tatarlar Uran ıruı başqortları ikän. Qayber käkşäygän qartlardan başqort buluları äytterelä. Älbättä inde, barısı da saf tatar telendä başqortlıqların iğlan itälär.

Şulay itep, Başqortstanda däwlät däräcäsendä tatarlıq ruxın tutıqlandıru, sındıru bara. Citmäsä tele açılıp ta betmägän, digändäy, tatar balalarına, mäcbüri räweştä, teldä häm añda butalçıqlıq tudıra torğan başqort tele uqıtıla. Ägär inde tatar milläteneñ kiläçäge-yazmışınıñ fäqät Tatarstanda häm Başqortstanda yäşäwçe tatarlarnıñ iminlegenä bäyle ikänlegen iskä töşersäñ, näq Başqortstan cirlegendä tatar milläteneñ tamırına balta çabılğanı añlaşıla.

Kärim Yauış, Ufa

XS
SM
MD
LG