Accessibility links

сишәмбе, 6 декабрь 2016, Казан вакыты 20:53

Tatarstannan çittäge yäş millättäşlärebez yañaça belem ala


Bıyıldan çit ildäge tatar yäşläre öçen distansion räweştä uqıtu oyıştırılğan - Tatarstan yuğarı uqu yortlarına kerügä äzerlek nisbätennän. Monda TR Prezidentı Apparatınıñ tışqı eşlär departamentı, Bötendönya tatar kongressı Başqarma komitetı, Tatarstan mäğärif häm fän ministrlığı häm Qazan däwlät universitetı qatnaşa.

Distansion uqıtu 200 yäş millättäşebezgä qarala, yäğni şul xätle keşegä Tatarstan Xökümäte aqça bülärgä tieş.

Distansion uqıtu Qazan däwlät universitetınıñ uqıtu-metodik üzägendä oyıştırılğan. Marttan iyüngä qädär çit ildäge tatar uquçıları öçen Berdäm däwlät imtixanı isemlegenä kergän 8 fän buyınça distansion räweştä belem alu qarala. Çönki çit ildäge belem birü ürnäkläre Rusiänekennän küpkä ayırıla. Bilgele bulğança, Tatarstannan çittäge yäş millättäşlärebezne Qazan yuğarı uqu yortlarına kertü inde 3 yıl oyıştırılıp kilä. Şul däwerdä törle awırlıqlar çıqqan. Bu xaqta Bötendönya tatar kongressı Başqarma komitetınıñ çit ildäge tatar oyışmaları belän eşläw bülege citäkçese Röstäm Ğaynetdinov:

Ber näticägä kildek, çit ildäge uqıtu Rusiä belem birü standartlarına turı kilmi. Anda rus tele dä naçar uqıtıla, Rusiä tarixı, cämğit beleme fännäre bötenläy kermi. Matematika, fizikalar anda da bar. Ämma bulmağan fännärne äzerläw öçen distansion uqıtu kerttek.

Tatar kongressı xezmätkäre Röstäm Ğaynetdinov belderüençä, çit ildäge tatar yäşlären uqıtu Tatarstan Xökümäte tarafınnan xuplanğan, läkin äle aqça küçmägän. Röstäm Ğaynetdinov:

Çit ildäge wäkilleklärne, milli üzäklärne komp'yuterlar belän tä'min itü qarala.

Röstäm Gaynetdinov äytüençä, Tatarstan xisabına barlığı 55 komp'yuter alınıp çittäge wäkilleklärgä häm tatar üzäklärenä quyılaçaq. Tatar tele buyınça uqırğa kerergä teşläwçelär öçen isä cäy könne lager'lar oyıştırılaçaq. Röstäm Ğaynetdinov:

Tatar tele belän bäyle fakul'tetlarğa kerergä teşläwçelär öçen cäy könne ana telebezne öyrätü öçen lager' oyıştıraçaqbız. 2-3 atna däwamında anda tatar telenä äzerlek kursları bulaçaq.

Röstäm Ğaynetdinov äytüençä, xäzer distansion räweştä uqırğa 31 keşe teläk beldergän. Alarnıñ sanı arta bara ikän. Ğariza birüçelärgä berençe çiratta ber uqıtuçı berketelä häm alarğa maxsus biremnär cibärelä. Bu programma tulı köçkä kiläse yılğa eşli başlar dip kötelä. Bilgele bulğança, 2009нчы yıldan yuğarı uqu yortlarına barı Berdäm däwlät imtixanı näticäläre buyınça ğına kerep bulaçaq. Şul waqıtqa bu distansion uqıtunı tulı köçkä eşlätü küzdä totıla. Çönki andağı biremnärneñ kübese Berdäm däwlät imtixanı belän täñgäl kiterelä.

Landış Xarrasova

XS
SM
MD
LG