Accessibility links

шимбә, 10 декабрь 2016, Казан вакыты 15:52

Novosibirskida “Seber yoldızları” festivale uzdı


6-7 aprel' könnärendä Novosibirski şähärendä “Seber yoldızları” dip isemlängän 4-nçe tatar sänğäte festivale bulıp uzdı. Festival'neñ oyıştıruçıları, ğädättägeçä, ölkä mädäniät departamentı häm ölkä tatar mädäniät üzäge buldılar. Qatnaşuçılarnıñ sanı 300-dän artıp kitte, alarnıñ geografiäläre dä kiñ ide. Ayırım başqaruçılar häm kollektivlar Novosibirskinıñ üzennän häm awıl-rayonnarınnan ğına tügel, Tomski, Omski, İrkutski, Barnawl, Kemerovo töbäklärennän, Buryätiä respublikasınnan häm Qazaxstannıñ Semey şähärennän dä kilgän idelär.

Festival' qısalarında konkurs oyıştırıldı. Anda qatnaşuçılarnıñ cırlaw, biyu, näfis süz söyläw, muzıka qorallarında uynaw ostalıqları tikşerelde. Bäyäne märtäbäle jyuri birde. Cyuri sostavında Tatarstannıñ mädäniät ministrlığınnan - çit töbäklär belän eşläwçe üzäk belgeçe İl'giz Kadıyrov, Bötendönya tatar kongressınnan – Tatarstannıñ xalıq artistı Gölzada Safiullina, Qazaxstannıñ Semey şähärennän – tatar sänğäte mäktäbe direktorı Gabdulxak Axuncanov, Tomski tatar mädäniät üzägennän - Ramilä Abaneewa häm Novosibirski tatar üzägennän - Säriä Şaripova buldılar. Äytergä kiräk, jyuriğa küp eşlergä turı kilde. Çönki, şart buyınça konkursnıñ saylap alu turı qatnaşuçılar yäşägän cirlärdä ütkärelergä tieş bulğan bulsa da, küp kollektivlar andıy tur ütkärep tormağannar, barlıq teläwçelärne da konkursqa alıp kilgännär häm saylaw eşen jyuriğa tapşırğannar. Şunı da assızıqlarğa kiräk, jyuri, qatnaşuçılarnıñ başqaru ostalığına qaramastan, ber genä keşeneñ da çığışın özmäde, axırına qädär tıñlap, xaqlı bäyäsen birde.

Festival'dä qatnaşqan qayber millättäşlärebez belän tanıştırıp kitü dä urınlı bulır. Roza xanım Vasil'yeva Buryätiäneñ Muxorşibir' rayonınnan kilgän. Anıñ süzlärençä. Muxorşibir' rayon üzägendä tatarlar äle ber genä yıl milli mädäniätne, yolalarnı tergezü östendä eşlilär. Üzläreneñ daimi oçraşu urınnarı yuq. Repetitsiälärne kemneñ dä bulsa öyendä, ä cıyılışlarnı berär eşmäkärneñ eş bülmäsendä ütkärälär ikän. İnde rayonda ber niçä märtäbä konsertta quyğannar. Milli mädäniätkä balalarnı da cälep itälär, tuğan telebezne dä öyrätälär. Äñgämä barışında Roza xanımnan min tatar sänğäte festivale barışında küñelendä nindi xislär tuuı turında soradım. “Miña is kitärlek tä'sir yasadı. Bez törle kollektivlar belän tanıştıq, adreslar alıştıq, ayırıla almıyça, yılaşıp ta aldıq”, - dide ul , xislänep.

“Seber yoldızları” festivalendä qatnaşuçılarnıñ yäşläre çiklänmägän ide. Anda 3-4 yäşlek nänilär dä, 60-70 yäşlek ölkännär dä qatnaştı. Jyuri dä, tamaşaçılar da ölkännärgä berniqädär tälapçän bulsalar, balalarnıñ çığışların ayıruça cılı qarşıladılar.Nänilär festival'neñ güzäl bizäkläre buldılar disäm, yalğış bulmas. Semey tatar sänğäte mäktäbendä şöğellänüçe Varvara Semenovanıñ häm “Borçaqlar” törkemen çığışları ber genä keşene dä bitaraf qaldırmağandır..

“Seber yoldızları” festivale “Tözüçelär” mädäniät sarayında zur konsert belän tämamlandı. Konsert programması eçtälekle häm qızıqlı itep tözelgän ide. Anda festival'dä qatnaşqan kollektivlarnıñ barsına da diärlek urın birelde. Çığışlar başlanır aldınnan zalda cıyılğan xalıqnı häm qatnaşuçılarnı tatar sänğäte bäyräme belän ölkä xakimiätennän Vladimir Miller häm İgor İvavenko täbrikläde. Annan soñ säxnägä Tatarstannın xalıq artistı Ğolzada Safiullina kütärelde. Ul oyıştıru eşlärendä yärdäm kürsätkän Novosibirskinıñ mädäniät departamentı xezmätkärlärenä Bötendon'ya Tatar Kongressınıñ räxmät xatların tapşırdı. Ğolzada xanımnıñ festival'dä qatnaşuçılarğa üz büläge dä bar ide. Älbättä bu anıñ moñlı häm yalqınlı cırları buldı. Annan soñ ul barlıq balalarnı da cäy könnärendä oyıştırılaçaq “Söyembikä warisları” konkursına çaqırdı.

Konsert tämamlanğannan soñ kollektivlarğa räxmät käğäzläre, istälekle büläklär tapşırıldı. Bäyräm barlıq qatnaşuçılarnıñ “Läysän” ansamble belän bergäläp cirle kompozitor Rafik Avliärov icat itkän “Seber gimnın” başqaru belän tämamlandı.

Saniä Mirxaleeva, Novosibirski

XS
SM
MD
LG