Accessibility links

шимбә, 3 декабрь 2016, Казан вакыты 20:42

Xakimiättäge xatın-qızlar: Segolene Royal


Düşämbe könne Fransiädä räsmi töstä saylawaldı kampaniäse başlanuı iğlan itelde. Köräş inde küptännän bara ide, ämma monnan soñ namzätlärgä televideniä häm radioda waqıt bireläçäk. Fiker beleşülärgä qarağanda, xalıq xäzer xakimiättäge konservativ firqa namzäte Nicolas Sarkozynı yaqlıy. İkençe urında, Fransiä tarixında prezident urınına däğwa itkän berençe xatın-qız Segolene Royal.

Torğan sayın franzuzlar Segolen Royalğa kübräk ömetlär bağlıy. Ul sosialistlarğa ber dä oxşamağan, dip yaza Fransiädäge fiker beleşü üzäge. Ul yäş, bay, belemle buluı belän üzenä näq şundıy uq keşelärne cälep itä. Aña aqçaları bulğan yäş aqıllı keşelär ışana, di belgeçlär.. Saylawlarnıñ berençe turı 22 april könne ütäçäk, añarçı Azatlıq dulqınnarında – Segolen Royal – kem ul, qaydan çıqqan, ğömerendä nilär başqarğan?

Sinegalda 8 balalı ğailädä 4nçe bulıp tuğan Segolenenıñ ätise – minem 5 balam häm 3 qızım bar dip äytergä yaratqan.... Qırıs dini tärbiä alğan Segolene ğömer buyı belem alu öçen köräşkän. Anıñ ätise – qız balağa irenä buysınıp bala tabu citkän dip sanağan. Katolik mäktäpne tämamlağaç, qız bala barıber franzuslarnıñ säyäsi qaymağı ğına uqıy torğan mäktäplärgä kergän häm üzeneñ säyäsi yulın elekke prezident Francoise Mitterand çorında başlağan. Segolene Royalga 53 yäş, anıñ tuğan köne 22 sintäberdä. Üz üzenä ışanğan, çibär häm aqıllı xanım, sosialistlarnıñ prezidentlıqqa namzät itep anı bilgeläwne – inqilapqa tiñläde:

"Idealar köräşen citäkläwçe häm ömet birüçe itep xatın-qıznı saylaw belän Sosialistlar firqase – Fransiä xalqı aldında ğına tügel, böten dönya aldında, soñğı 20 yıldan artıq waqıtta – inqilabi adım yasadı."

Başqa sosialistlardan bu xanımnı tağın şul ayıra – ul çeterekle mäsälälärne urap ütmi häm qaywaqıt kisken belderülär yasıy. Segolenenıñ berniçä belderüen mäğlümat çaraları äle dä xäterli... Fivral ayında Parijda ul, Kanada radiosına birgän äñgämädä, Kanadanıñ fransuzça söyläşüçe Quebec vilayäteneñ bäysezlege yaqlı bulyın beledergän ide. Bu süzlär Kanadanıñ açuın çığardı, premyer-ministr Stephen Harper, Royalnıñ belderüen – Kanada eşlärenä tıqşınu dip bäyäläde häm, cawap itep, bälki Fransiäneñ üzendäge Korsika utrawında da bäysezlek birergäder dip soradı. Royalnıñ kiñäşçese Jack Lang şunda uq kierenkelekne yomşartırğa tırışıp wazğiätkä açıqlıq kertkän ide.

Segolene Royalnıñ dönyanı şaqqatırğan tağın ber belderüe – kommunistik Qıtaynıñ yuridik sistemasın xuplawı ide. Häm Libanda bulğan çaqta Yevropa Berlege tarafınnan terror oyışması dip sanalğan Hezbolla wäkilläre belän oçraşuı ide...

Säyäsi yaqtan bu kötelmägän adımnarğa qaramastan, Fransiädä anıñ belän qızıqsınu arta... İlneñ üzendä dä ul şundıy kötelmägän adımnar yasıy. Misal öçen ul, baliğ bulmağan cinäyätçelärne törmägä utırtu urınına – ğaskärgä alunı täqdim itte. 35 säğätlek eş atnasına da Segolene Royal qarşı, andıy zamannar ütte inde dip sanıy ul.

Fransiä prezidentı urınına däğwa itkän xanımnıñ ğailä xälläre dä qızıqsındıradıradır sezne. Segolene Royal häm anıñ tormış iptäşe Francois Holland bergä 4 bala üsterälär. Holland äfände Fransiäneñ sosialistlar firqaseneñ berençe sekretare. Bu yulı – ire tügel, ä tormış iptäşe dip äytü bik urınlı, çönki Segolen belän Fransois öyläneşmägän.

Fransiädä saylawlar 22 april, yäkşämbe könne ütäçäk. Namzätlärneñ berse dä 50%tan artıq tawış ala almasa, tawış birüneñ ikençe turı bilgelänäçäk.

Alsu Qormaş
XS
SM
MD
LG