Accessibility links

шимбә, 10 декабрь 2016, Казан вакыты 02:05

Pensionerlar fäqirlekkä qarşı


Sişämbe könne kiçke säğät 4 lärdä Tatarstan däwlät Sovetı häm ministrlar kabinetı qarşındağı mäydanda berniçä yöz keşe qatnaşlığında uram cıyını uzdı. Qoyaşlı yazğı salqınça kön kiçkä taba awışqanda uramda 10 minutta basıp torıp bulmıy. Qarlarnı eretep yörüçe cil qoyaşqa nigä qarap tormıy qışqıdan da xätärleräk öşetä. Ber dä uram säyäsäte öçen caylı waqıt tügel. Däwlät Sovetı basqıçı qarşıdağı mäydanda maşinalar yanına kilüçelär kötelmägän keşelär ağımına oçradı. Qızıl, zäñgär bayraqlar, yuğarı pensiä häm eş xaqları taläp itkän berniçä yöz keşe tiz genä parlament qarşına bastılar. Küzläre Däwlät Sovetınıñ komitet räisläre häm Färit Möxämmätşin utırğan bülmälärneñ täräzälärenä yünälgän. Bötenrusiädä pensiälärneñ 2-3 meñ buluın, eş xaqlarınıñ tübän buluın iskä alğanda näq şuşı könne Tatarstan deputatlarınnan närsä taläp itkännären añlıymı soñ bolar? Ul waqıtta deputatlar häm parlament citäkçeläre üz bülmälärendä dä tügel. Kem öçen mitinglar oyıştırıla disäñ, ul Bötenrusiä profsoyuzlar aksiäse bulıp çıqtı. Aktivislar oyışqan räweştä tiz genä kilep bastılar, yazuları usal häm döres itep yazılğannar. Ni disäñ dä profsoyuz, ul küptännän täcribä tuplağan oyışma. Tatarstan profsoyuzları citäkçese Tat'yana Vodom'yanova Berdäm Rusiä firqäse isemlegendä ikençe bulıp bardı, üze dä deputat bulıp yöri.

Şunda taratılğan käğäzlärdä añlaşılğança, taläplär federal' xakimiätkä yünälderelgän. Berençe, berdäm sotsial' salımnı yuqqa çığarırğa. Pensiä waqıfına aqça küçerüne döres şkala buyınça alıp barırğa, kiläse yılnıñ 1 dekaberennän minimal' eş xaqın yäşäw minimumına turı kiterergä. Barsı da pensionerlar faydasına, ğadi eşçelärgä häm däwlät xezmätkärlärenä dä ber ük standartlar buyınça pensiä tülärgä. Sotsial' pensiälärne yäşäw minimumına tigezlärgä. Bik ğädel häm kiräk taläplär bu. Ütäwçese kem ikän? Mäydanda taratılğan xatta federal' xakimiät orğannarına möräcäğät bar. Ä Tatarstan däwlät Sovetına häm ministrlar kabinetına şuşı taläplärne yaqlarğa häm federal' däräcädä alırğa ütätergä tırışırğa täqdim itelä.

Parlament binasın urap İrek mäydanına çıqsam, xökümät qarşında da näq şundıy uq şiğar'lär belän 500 läp keşe basıp tora. Alay qıçqırmıylar, çığış yasawçı da yuq. Çönki bu miting tügel, ä piket qına ikän. Şulay da söyläşergä çığuçı çinovniklar buldı Alarğa qarşı profsoyuz piketçıları ber keçeräk kenä kärzin kütärep kildelär. BU kärzingä salınğan produktlar, näq däwlät tarafınnan sanap çığarılğan minimal' qullanu kärzine tügel. Bu pensionernıñ könlek minimal' kärzine. Bu kärzinne ber genä çinovnik ta qulına alırğa telämäde. Sizälär yünlegä iltmi, bu kärzinne büläk itü. Çönki anda salınğan ber qıyırçıq ipi, 2 -3 şaqmaq şikär, çänçi barmaq qädär sır kisäge, stakan yarım söt häm 2-3 millimetr ozınlıqtağı tämäke yançığı. Yäğni pensiägä yäşäsäñ menä şul kärzinnän sıyınalasıñ. Piketqa kilgän ber ağay üze zatlı ğına kiengän, ämma çırayı küñelsez. Bügen 30 -40 meñ sum eş xaqı alğan keşelärneñ pensiäläre dä 3-4 meñnän artmıy. Ä qayberäwlär xäzer ük şul 2-4 meñ eş xaqına yäşi. Kemnän taläp itärgä? Profsoyuzlar aksiäse küpçelek xalıqnıñ küñelenä xuş kilsä dä, mäydanda planlaştırılğan 1 säğätlek piket urınına 30 minut qına basıp tordılar. Kön salqın, şiğar'lär küñelsez, tıñlawçı häm işetüçe buluına ömetlär zur tügel. Tege xurlıqlı kärzinne Tatarstannıñ xezmät häm eş belän tä'min itü ministrı Boris Zaxarovqa tottırdılar. Ni äkämät bu ministrnıñ älege minimal' kärzingä bernindi dä mönäsäbäte yuq. Ul keşelärgä eş tabıp birä häm eş xaqları yuğarıraq bulsın dip tırışa. Ä aqçalarnı bülgändä annan soramıylar. Şunda torğan ber profsoyuz çinovnigı minimal' kärzinne xisaplawçı bötenläy başqa keşe buluın äytte. Bu kärzinne iqtisat ministrı urınbasarı Alevtina Niqolayıwnağa birergä ide dä bit dip uftandı ul. Kem belä ministr Zaxarov Alevtina xanımnı ezläp tabıp kärzinne tapşırırmı yuqmı. Şeşädäge söt, barmaq başı qädär sır kisäge bozılıp betkänçe qabul itärlek keşe tabılmas möğayın. Ä Mäskäw yıraq. Anda kärzinne sanawçılar da, şundıy uq aksiäne oyıştıruçılar da utıra. Xäyer bu mäğlümatlar berkemgä dä ser tügel. Tik minimal' kärzinne tapşırır keşe genä yuq.

Rimzil Väli

XS
SM
MD
LG