Accessibility links

чәршәмбе, 7 декабрь 2016, Казан вакыты 19:37

Swerdlaw ölkäsendä Öçençe Ölkä Islam Olimpiadası uzdı


Sverdlovski ölkäse Pervoural'ski şähäre mäçetendä Qazıyat idäräse tarafınnan oyıştırılğan “İslamnıñ yäş belgeçläre” dip atalğan Öçençe ölkä olimpiadası bulıp uzdı. Olimpiadanıñ berençe ike turı awıllar häm rayon-şähärlärdä, ğinwar – fevral' aylarında, ike yäş törkeme – 14 yäşkä qädär bulğan balalar arasında häm 14 yäştän ölkänräk bulğan üsmerlär arasında uzdırılğan ide. İkençe turda berençe urınnı aluçılar islam dineneñ nigezläre turında referatlar yazıp, ölkä buyınça uzdırılğan öçençe turda qatnaşu xoquqına layıq buldılar. Ölkäneñ iñ ğilemle imamnarınnan, möğallim din ähellärennän torğan wäqälätle jyuri, referatlarnı tikşergändä, alarnıñ eçtälegenä häm tışqı bizäleşenä iğtibar itte. Şulay da xälitkeç rol'ne referatlarnı yaqlaw protsessı uynadı. Jyuri äğzaları qatnaşuçı balalarnıñ tışqı qiäfätlärenä, kiemnärenä dä iğtibar birde.

Olimiadada Yekaterinburg, Pervoural'ski, Degtyärski, Asbest, Mixaylovski şähärlärennän häm Krasnoufim, Tübän Sırğa rayonnarı awıllarınnan kilgän balalar qatnaştı. Bäygeneñ näticälärenä yomğaq yasağanda, jyuri beraz aptıraştaraq qaldı. Nik digändä, öçençe turğa çığuçı balalarnıñ belemnäre, ber-bersennän qalışmaslıq, köçle bulıp çıqtı.

Nigezlämä buyınça qaralğan barlıq şartlarnı isäpkä alğannan soñ, 14 yäşkä qadär bulğan balalar arasınnan Yekaterniburgtan 11 yäşlek Liliä İsmäğileva ciñüçe dip tabıldı. Liliäne däw änise keçkenädän ük dingä ışanırğa, namazğa basarğa öyrätkän. Könenä biş waqıt namazımnı qaldırmıym, dip söyläde bezgä Liliä.

Ğailägä yış qına qunaq bulıp kilgäläp yörüçe Möxämmät xäzrät qıznı ğäräp tele grammatikasına öyrätä ikän. Xäzer inde Liliä ğäräpçä yarıysı ğına öyränep kilä. Başqa çit tellärne, ingliz, fransuz tellären dä bik teläp öyränä. Kiläçäktä tärcemäçe bulırğa xıyallana.

14 yäştän ölkänräklär arasınnan berençe urınnı ike keşe – Mixaylovski şähärennän 15 yäşlek Elina Äkmäletdinova häm Pervoural'skidan 16 yäşlek Uqtam Tuçeev büleştelär. Elina jyuri äğzaların islam dineneñ asılların bik yaxşı üzläştergän buluı, orator ostalığı belän genä tügel, çın möselman tutaşlarına ğına xas itep kiengän kieme, açıq mölayım yöze, tıynaqlığı belän äsir itte. Ä Uqtam Tuçeev kiläçäktä üzeneñ yazmışın islam dine belän bäyläw turında citdi uylana ikän.

Olimpiadağa näticä yasaw tantanasına xalıq küp bulıp cıyılğan ide. Tübän Sırğa rayonınnan kilgän Nurislam xäzrät cıyıluçılarğa balalarıbıznı dingä tartu buyınça üget-näsixät birde. Anıñ äytüençä, balanı biş yäşennän un yäşenä qädär, “çıbıqnı bögep bulğan çaqta” dini ğilemgä tarta başlarğa kiräk. Kübebez äle bala yäş, ölgerer äle dip anı mäçetkä alıp kilergä aşıqmıybız, dide Nurislam xäzrät.

Jyuri äğzası, Yuğarı Pışma şähäreneñ Baqır mäçete imamı Ayrat xäzrät Möxämmätcanov, Pervoural'ski şähäre mäçete din ähelläreneñ balalarnı yäştän ük dingä kiterü buyınça alıp barğan eşen yuğarı bäyäläde häm bu eş ürnäk alırğa layıq dip belderde. “Dini ğilemgä omtılğan, Allağa ışanğan, mäçetkä yörüçe balalarnı kürep bik söyendem. Dimäk, kiläçägebez bar. Ä üzebezdä äle bez mondıy uq çaralar ütkärä alğanıbız yuq. Nasıyp bulsa, cäyge dingi seminarlar uzdıra başlap, Yuğarı Pışmada da balalarnı dingä tarta başlarbız”, - dide Ayrat xäzrät.

“İslamnıñ yäş belgeçläre” dip atalğan Öçençe ölkä olimpiadasında ciñep çığuçılar aqçalata premiä belän büläkländelär. Jyuri şulay uq alarğa islam ğilemen öyränüne däwam itüdä häryäklap yärdäm itäçägen belderde.

Fäwiä Safiullina, Yekaterinburg

XS
SM
MD
LG