Accessibility links

шимбә, 10 декабрь 2016, Казан вакыты 00:22

Semberdä dä pensiäne arttırunı taläp ittelär


Bötenrusiä külämendä iğlan itelgän miting şuña bağışlanğan ide. Mitingqa kilüçelärne menä nindi şiğar'lär qarşıladılar.

Pensiä genotsidın tuqtatırğa!

Sotsial' terrornı beterergä!

Pensiäne yäşäw däräcäsenä kütärergä!

Xalıqqa yarlılar posobiese tügel – PENSİÄ kiräk!

13 protsent salım – oligarxlar öçen çüp kenä ul!

Çubays terrorına çik quyılsın! – häm başqa şundıyraq eçtälekle şiğar'lär.

Şunısı qızıq: ber ük taläplär KPRF, Berdäm Rusiä firqäse şiğar'lärendä dä. Dimäk, alar bu mäs'älädä berdäm!

Kommunistlar – añlaşıla… Ä menä xakimiätne üz qullarında totqan “Berdäm Rusiä” nigä soñ pensiäne tawış-tınsız ğına partiä eçendä xäl itep, Duma aşa uzdıra almıy ikän? “Yäş gvardiä” dip yazılğan flaglar astında tuplanğan 100 çaması yäşlär citäkçese şuşı sorawğa qısqa ğına cawap belän çiklände.

Bu soraw miña ağılmıy – eto ne moy vopros.

Tağın ber şiğar iğtibarnı cälep itä: “Ğadel Rusiä – ğadel pensiä yaqlı!” Monısı “Spravedlivaya Rossiä” dip yazılğan flaglar tiräsendä tuplanğannarnıqı. “Yäş gvardiä”çelärdän ayırmalı bularaq, boları älegä üz firqäläreneñ xakimiättä tormawı belän añlattılar. Dimäk, Tatarstan belän “Kileşügä” teş-tırnağı belän qarşı çığıp, Putin imzasın da ciñgän Mironov ta xakimiättän yıraq tora ikän…

Döres, çığış yasawçılar arasında “Ğadel”lärne sügüçe bulmadı, ä “Berdäm”närgä eläkkäläde.

Şul qädär xakimiättä torıp ta, Berdäm Rusiä xalıq öçen bernindi yaxşılıq ta eşlämäde!

Tribunağa çığa almağan beräw isä üz xäsräte belän soñnan ğına büleşte.

100 meñ retsept polqalarda yata – darular yuq. Mine ğadi aspirin- enovoprilğa 8266-nçı itep çiratqa quydılar.

Çığış yasawçılar arasında Rusiäneñ barlıq xalıqların da tügel – urısnı ğına qayğırtuçılar da bar ikän.

Menä niçä yıllar buyı inde, qızğanıç, urıs xalqı ülep betep bara!”

Miting, ğädättägeçä, Rezolyutsiä qabul itü belän tämamlandı. Ul bu çaranı açıp cibärgän profsoyuzlar liderı Viktor Slujivoynıñ kereş çığışında yañğırağan taläplärdän tözelgän ide. Menä ber özek.

Bez Prezidenttan, Xökümättän häm Federal' cıyılıştan 2008-yılnıñ 1-dekaberennän iñ az pensiäne iñ az yäşäw minimumı däräcäsenä citkerüne, pensiä külämen, çit illärdäge kebek, eş xaqınıñ 40 protsentınnan da kim bulmawın taläp itäbez…

Ayrat İbrahim, Sember

XS
SM
MD
LG