Öçençe yıl rättän İjaw şähäreneñ tatar gimnaziäsendä respublika küläm konferensiägä Udmurtiäneñ törle töbäklärennän fän belän qızıqsınğan balalar cıyıla. Gimnaziä berençe yılınnan uq Udmurt däwlät universitetınıñ çit tellär institutı uqıtuçıları belän tığız elemtä buldırdı. Uqıtuçılar da, uquçılar da başta tellär ölkäsendä fänni tikşerenü eşläre belän şöğellänä başladı. Soñraq ädäbiät, tarix, informatika fännären tiränräk öyränü maqsatınnan bu ölkädä dä fänni tikşerenü eşlären alıp barırğa digän qararğa kildelär. Balalar häm uqıtuçılarnı berläştergän «Evrika» dip atalğan fänni oyışma da berniçä yıl eşli. Udmurt däwlät universitetınnan ölkän uqıtuçı, fänni konferensiälärne oyıştıruda yärdäm itüçe Liliä Xäsänova belderüençä, bıyıl qışqı kanikullar waqıtında uquçılar öçen maxsus uqular da oyıştırılğan. Anıñ maqsatı gimnaziä uquçıları tarafınnan fänni eşlärgä citdi qaraş buldıru. Bu, üz çiratında, gimnaziä uquçılarınıñ konferensiägä täqdim itkän eşläreneñ tirän eçtälekle, tieşle näticälär yasalğanın bilgeläde Liliä Xäsänova.
Liliä İl'dus qızı Xäsänova süzlärenä qarağanda, bıyıl konferensiädä 127 bala qatnaşqan. Bu ütkän yıl belän çağıştırğanda, küpkä artıq ikän. Barlığı un seksiä eşlägän. Balalar ädäbiät, fälsäfä seksiälärenä dä küp kenä eşlär täqdim itkän. Ayıruça çığış yasawçılar ingliz, alman, rus, tatar häm udmurt telläre seksiälärendä küp bulğan. Konferensiädä ekspert rolen başqarğan universitet uqıtuçıları balalarnıñ eşlärenä yuğarı bäya birde. Alarnıñ kübese şuşındıy konferensiälärdä inde berniçä yıl rättän qatnaşa ikän.
Yıldan yıl balalarnıñ eşläreneñ eçtälege tiränäya, qızıqlı fänni näticälär yasala, çit tellärne öyränüdä qızıqsınu artuın bilgeläde seksiädä qatnaşqan här uqıtuçı. Şulay uq tellärne çağıştırıp öyränügä bağışlanğan eşlärneñ dä bik qup buluın assızıqladı tikşerüçelär. Gimnaziäneñ ädäbiät uqıtuçısı Güzäliä Garif'yanova balalarnıñ çığışların tıñlap, iskitkeç qızıqlı eşlär buluın bilgeläde.
Gimnaziä uquçıları Alsu Yuzeqayıwa, İnsaf Şäripov, Gölnur Möslimova häm Gölnur Axunovalar diplomnarğa iä buldılar.
Alsu Yuzeqayıwa, 11 sıynfı uquçısı, ğäräp filosofiäse belän qızıqsına, ä sigezençe sıynıfta uquçı İnsaf Şäripov, şäxesneñ bügenge zamanda totqan urını, şöğele, yäşäw räweşenä bağışlanğan eşen tamaşa itkän. Alar bu yünäleştä kiläçäktä dä tikşerenülären däwam itärgä niätli. Alsu — Udmurt däwlät universitetınıñ filosofiä fakul'tetın saylağan, İnsaf — fänni citäkçese belän temanı kiñräk yaqtırtırğa uylıy.
Konferensiädä qatnaşırğa teläk beldergän balalar bik küp ide, ämma bez alarnıñ sanın çiklärgä möcbur buldıq, dip urtaqlaştı gimnaziäneñ direktorı Gölzigä Äxmätşina.
Gimnaziä qissalarında uzğan fänni konferensiädä här bala qatnaşa ala. Bıyıl xätta başlanğıç sıynıf balaları da fängä berençe adımnarın yasağan.
Yuğarı uqu yortlarınnan uqıtuçılar bu konferensiädä qatnaşqan här balanı kiläçäktä üzläreneñ studentları itep kürergä ömetlänä. Tik menä elekke yıllarda şuşındıy konferensiälärdä ciñü yaulağan uquçılarğa yuğarı uqu yortlarına kergändä taşlamalar birelsä, xäzer, berdäm däwlät imtixannarı näticäläre isäpkä alınu säbäple, uquçılarnıñ fänni ezlänü eşläre, ireşkän uñışları alarğa yärdäm itä almıy. hiçşiksez, fänni ezlänü eşläre uquçılarnıñ belemen arttıraçaq dide universitetnıñ çit tellär institutı direktorı Tamara Zelenina. Şulay da bez şuşındıy diplomnarı bulğan abiturientlarğa iğtibarlı bulaçaqbız dip östäde direktor.
Xämidä Ğayfullina, Udmurtiä
