Accessibility links

шимбә, 3 декабрь 2016, Казан вакыты 22:53

Qazanda turizmğa bağışlanğan kürgäzmä açıldı


Pänceşämbedä Qazanda turizm industriäsenä bağışlanğan zur kürgäzmä açıldı. Bu çara Tatarstan başqalasında inde 12nçe tapqır ütkärelä. Yıldan-yıl kürgäzmädä qatnaşuçılar sanı arta bara. Bıyıl anda Rusiäneñ 32 töbägennän turizm käsebe belgeçläre, administratsiä wäkilläre, ğalimnär, çit illärdäge turistik oyışma wäkilläre qatnaştı. Bu çaranıñ maqsatı - eçke häm tışqı turizmnı üsterü.

Törkiäne täqdim itkän Şaometdin Kurt turistik kürgäzmädä inde unınçı tapqır qatnaşa. Anıñ süzlärenä qarağanda, Törkiä belän Tatarstan arasındağı elemtälär ike yaqqa da faydalı:

Törkiädän monda kilüçelär häm Tatarstannan Törkiägä kitüçelär küp. Tatarstanlılar Törkiägä yal itärgä barsa, töreklärgä tatarlar belän duslıq bergä eşläw häm yal itü öçen kiräk

Ä kürgäzmä nigezdä eçke turizmğa bağışlanğan ide. Tatarstannıñ başqa töbäklärgä, illärgä kürsäterlek qazanışları, tarixi baylıqları az tügel. Alarnı kürsätä dä belergä kiräk bit äle. Qazan yärminkäsendä açılğan xalıqara kürgäzmädä Tatarstan üzen niçek täqdim itte soñ? “Salawat” turistik kompaniäse citäkçese Qamıl Tärcemanovnı tıñlap kitik:

Tatarstan, Qazan stendları bik şäp kürsätelde monda. Älmättä yaña sanatoriy açılğan, ul da kürsätelgän. Respublikanıñ turizm industriäse şaqtıy alğa kitte diep äytergä bula. Bu bezgä faydağa ğına.

“Novinqa” turistik şirkäte citäkçese Firdäws Biktimerova isä kürgäzmä turında bolay dip söyläde:

Min bu kürgäzmädä inde berniçä yıl rättän qatnaşam. Döresen äytkändä, monda miña qızıqlı närsälär älläni yuq. Menä miña Tatarstan muzeyları oşıy. Balalarnı şunda alıp barırğa telädem. Monda muzeylarnıñ wäkilläre kilgän, alar Tatarstan muzeyların täqdim itä. Ä alarnıñ stendlarında muzeyğa kerü bäyäläre kürsätelmägän. Bu citeşsezlek minemçä.

Firdäws Biktimerova äytkän muzeylar kürgäzmädä qatnaştı. Anda barlığı Tatarstannıñ 23 muzey bar ide. Qayum Nasıyri muzey citäkçese Ruşaniä Xösnetdinova süzlärenä qarağanda, respublika muzeyları turizm industriäsennän äle yıraq.

Turistlar isä Tatarstanğa şaqtıy küp kilä. Şulay da älegä respublikada turizm industriäse üsep kitä almıy. Säyäsätçe, Tatarstan cilkän sportı Federatsiäse citäkçese Rafael Xäkimov söyli:

Tatarstanda turistlar kübäyde xäzer. Monıñ belän bäxäsläşep bulmıy. Läkin ikençe yaqtan qarağanda, bez äle turizm tarmağın respublika iqtisatına aqça kerterlek däräcägä citkerä almıybız. Menä min qarıym, üz avtobuslarına töyalep kilälär, kitälär. Kibetlär, suvenirlar citmi.

Turistik kürgäzmä 14 aprel'gä qädär däwam itäçäk. Kürgäzmä qısalarında turizm industriäsen üsterügä bağışlanğan fänni-ğamäli kiñäşmä dä ütäçäk.

Al'bina Zäynulla

XS
SM
MD
LG