Accessibility links

җомга, 9 декабрь 2016, Казан вакыты 05:02

Xalıq-ara kongress: “Xäzerge çorda Rusiä tarixı fäne: kiläçäge häm milli mäğärif säyäsäten ğämälgä aşıru”


Bu kongress törle xalıqlar häm illärneñ tarix, uqu-uqıtu ölkäsendä ireşkän uñışları belän urtaqlaşu maqsatınnan ütkärelä.Ul 18-19 aprel' könnärendä Tatarstan Prezidentı M.Ş.Şäymiev yärdäme belän oyıştırıla. Anıñ tulı iseme “Xäzerge çorda Rossiä tarixı fäne: kiläçäge häm milli mäğärif säyäsäten ğämälgä aşıru”. Anı uzdıru Tatarstan Fännär akademiäse, Ş. Märcäni isemendäge tarix institutı, Tatarstannıñ fän häm mäğärif ministrlığı, Tatarstan tarixın uqıtuçılar assotsiatsiäsenä yöklätelgän. Älege çarada Rusiä Federatsiäsendä tarix fäneneñ täcribä bularaq uqıtıluına näticälär yasalaçaq. Şulay uq tarix fäneneñ tolerantlıqnı formalaştıruda häm ksenofobiä, rasizm kebek küreneşlärgä yul quymawğa etärgeç bula aluı; Rusiä xalıqları tarixın öyränü täcribäsen ğomumiläşterü; Rusiä mäktäplärendä dingä kereş fäneneñ üseş yulları turında fiker alışular planlaştırıla. Kongressnıñ nindi maqsat belän uzdırıluı häm qaysı illärdän ğalimnär kilüe xaqında çaranı oyıştıru äğzası Marat Gıybatdinovqa da sorawlar birdek:

Kongressnıñ töp maqsatı Rossiädä tarix uqıtunıñ torışın yañadan öyränep, tarix däresleklärendä tatar xalqı häm başqa xalıqlarnıñ niçek çağılğanın dön`ya küläm tarix uqıtu probleması ni däräcädä quyıluın qararğa. Tatarstan, Rusiä, çit ildän kilgän ğalimnär belän kiñäşep, söyläşep, Rusiädä tarix fänen mäktäptä häm yuğarı uqu yortlarında niçek uqıtılırğa tieş, häm Rusiä tarixı ğına bulırğa tieşme ul, ällä Rusiä xalıqları tarixı bulırğa tieşme digän sorawlar qaralaçaq. Kongressta Rossiä mäğärif ministrlıysınnan wäkillär, Däwlät duması deputatları, Fännär akademiäse, Federal' institut, Milli problemalarnı öyränü institutı ğalimnäre qatnaşa. Şulay uq Törkiädän Nadir Däwlät citäkçelegendäge ğalimnär, Germaniä, İtaliä, Qıtay, Misır ğalimnäre kötelä.

Kongressta başqaladan häm çit illärdän kilgän ğalimnärdän qala, şulay uq tarixçılar, pedagoglar, tarix didaktikası fäne belgeçläre, dingä kereş häm tarix fäne uqıtuçıları da yaña belemnär tuplap, üz täcribäläre belän urtaqlaşa ala. Läkin qatnaşu öçen soraw käğäzläre yazu inde ğinwar ayında uq tögällängän. Kongressnı tarixçılar da, milli säyäsät häm xoquq, pedagogiä belgeçläre dä tüzemsezlek belän kötä.

El'mira Gazizova

XS
SM
MD
LG