Accessibility links

якшәмбе, 11 декабрь 2016, Казан вакыты 07:13

Qazan universitetında Ğazi Qaşaf uquları


Qazan däwlät universitetında yaz könnärendä qızıqlı wä ähämiätle çaralar şaqtıy ütä. Şularnıñ bersen jurnalistika fakul'tetı oyıştıra. Yıl sayın alar Tatarstanda jurnalistika fänenä nigez salğan, jurnalistika fakul'tetınıñ ataqlı möğallimnärenä bağışlap fän könen uzdıra. Bıyıl älege çara tanılğan yazuçı, ğalim Ğazi Qaşşaf istälegenä bağışlap ütkärelä. 15 aprel'dä anıñ tuuına näq 100 yıl tula. Ni öçen soñ jurnalistlar Ğazi Qaşafnı saylağan? Universitetnıñ jurnalistika häm sotsiologiä fakul'tetı dekanı, professor Wasil Ğarifullinnı tıñlap kitik:

Ğazi Qaşaf Qazandağı jurnalistika fakul'tetına nigez saluçılarnıñ berse. 50нче yıllar axırında ul Xatıyp Ğosman, Möxämmät Ğäynullin, Şämsi Xammatovlar belän bergä respublika öçen jurnalistlar äzerläw eşen başlap cibärgän. Alar tatar filologiäse bülegendä çittän torıp uquçı studentlar arasında jurnalistika maxsuslaşuın kertep cibärä. Täwfıyk Sägıytov, Älmirä Ädiätullina, Möslimä Şäfıyk, Şamil Räkıypovlar şunda uqıp çıqqan. Ä inde 60nçı yıllarda Ğazi Qaşaf tırışlığı belän Qazanda İdel buyında ul waqıtta berdänber jurnalistika kafedrası açıla. Ğazi ağa näq milli jurnalistlarnı äzerläwgä zur iğtibar birä.

Ğazi Qaşaf uquları isä çaralarğa bik bay buldı. Alarnıñ iñ berençese - yazuçınıñ mirasına bağışlanğan fänni-ğamäli kiñäşmä ide. Ul studentlar öçen oyıştırıldı. Monnan tış ayırım uqıtuçılar öçen dä tağın ber kiñäşmä ütäçäk. Ul Tatarstanda milli jurnalistlar äzerläw mäs’äläsenä bağışlana. Şulay uq Ğazi Qaşaf uquları qısalarında Qazan universitetınıñ uqıtuçıları, ğalimnäre tarafınnan çığarılğan kitaplar kürgäzmäse eşli başladı. Bu kürgäzmäne Ğazi Qaşaf xezmätläre açıp cibärde. Studentlar tarafınnan äzerlägän fotoräsemnär kürgäzmäse dä açıldı.

Ä studentlar üzläre isä comğa könne uqırğa barmadı. Universitetta ütkän fän könendä alar fäqät fän belän genä şöğellänergä tieş ide.

Al'bina Zäynulla

XS
SM
MD
LG