Accessibility links

Кайнар хәбәр

Törek armiäse Säddamnıqınnan köçsezräkme?


Bu atnada Tönyaq Ğıyraqtağı Kördistan cirle xakimiäte başlığı Mäsğud Barzani el-Arabiya televiziäsenä birgän intervyüsendä “ägärdä Töreklär Kirkuqtağı ber niçä Törkmän öçen xärbi intervensiä yasasalar, bez dä 30 million Körd öçen alarnıñ Diyarbakır häm başqa şähärlärenä intervensiä yasarbız, Törek armiäse dä Saddamnıqınnan köçleräk tügel” digän belderü yasağanı bilgele bulğaç, Törkiädä köçle reaksiä tudı. Şuşı belderü waqıtına näq turı kilep ilneñ könyaq könçığışında ike ayrım urında qayberläre minalarğa basıp, qayberläre isä Körd partizannar belän qorallı bäreleşlär arqılı11 ğäskärneñ şähit töşüwe şuşı reaksiäne tağın da üstergän ber etärgeç buldı. Ber ük waqıtta Milli Qurqınıçsızlıq Şurası da waqıttan elek cıyılıp şuşı täräqqiätlär turında şuranıñ xärbi häm xökümät qanatı mäslixätläştelär. MQŞ-nıñ mätbuğatqa tapşırılğan belderüwendä, “Ğıyraqnıñ tönyağında ilebezgä bulğan terror kisätüwenä qarata Ğıyraq xökümätenä birelgän nota häm monnan soñ alıp barılaçaq säyasi, ekonomik häm başqa çaralar turında mäslixätläşelde” diyelä. Bu belderüdä diqqätne iñ küp cälep itkän süz tezmäse “başqa çaralar” buldı. Bu başqa çaralar bulsa xärbi çaralardır digän analizlar yasala.

Barzaninıñ Törkiäne açulandırğan çığışınnan soñ Premier Erdoğan “Alar astında qalaçaqları süzlär äytmäsennär. Soñında bu süzlärneñ astında üzläre izelerlär. Törkiä belän çiktäş bulğan Tönyaq Ğıyraq xäzerge waqıtta atlağan adımnarında bik citdi xatalar yasıy häm monıñ näticäse alar öçen bik awır bulır” digän reaksiä kürsätte. Tışqı eşlär ministere Abdullah Gül dä jurnalistlarğa bik qısqa ğına itep, nindi çara qullanaçağıbıznı küräçäksegez” dip äytte. Monnan tış ul AQŞ tışqı eşlär ministere Condoleezza Rice’tan Barazaninıñ kisätelüwen taläp itte. Talabani Barzaninınıñ mätbuğatta çıqqan süzlärennän qayğılanuwı turında äytkän. AQŞ tışqı eşlär ministerlege süzçese Sean McCormack “ Mondıy belderülär , Törkiä belän Ğıyraqnıñ urtaq problemalarnı çişüdä xezmättäşlek urnaştıruına hiç tä yardäm itmi” dip belderde. Şuşı belderülärdän soñ Barzani “İnde ber il niçek itep üzendä başqa ber ilneñ eç eşlärenä qatnaşu xoquqın kürä ,ämma üzenä qarata şuña oxşaş kisätü alğanda tınıçsızlana” dip süzlärennän kire qaytmağan buluın kürsätte. Ul “min bezgä tıqşınsalar, bez dä şul uq räweştä cawap qaytarırbız dip äytkän idem, dide.

Unlağan tank Ğıyraq çige tiräsendä manevrlar ütkärä başladı. Generalştab başlığı armiä generalı Yaşar Büyükanıt 12-nçe Apreldä töştän soñ jurnalistlarğa töbäp yasağan çığışında, ber soraw säbäple, Barzani äytkän süzlär tübän däräcäle ide, ämma anıñ süzlärenä tügel, aña bu süzlärne äyttergän köçkä ähämmiät biräm dide. Ul ayruça parlamenttan röxsät bulsa, Törek Qoralı Köçläre tiyeşle operatsiäne yasap, uñışlı da bulır ide dide. Büyükanıt mondıy ber xärbi operatsiäneñ faydası bulaçağına da işarä itte. Başqa ber sorawğa isä Ğıyraq öçkä bülenä, yaqın häm urta kiläçäktä Ğıyraqta problemalar çişelmäyäçäk, sönnilär Kördlärne AQŞ yaqlıy dip belälär dip äytte. Ber kön elek isä Büyükantınıñ arası bozıq dip bäyälängän politsiägä vizit yasawı, “ bez imenlek köçläre hämmäbez it belän tırnaq” dip äytewe, Törkiäneñ zurıraq ber operatsiägä äzerlänüenä işarä itä.

Qısqası Törek cämağätçelege PKK terrorına qarata çaralar kürelüen taläp itä. Bu çaralar arasında Tönyaq Ğıyraqta urnaşqan PKK xärbi bazaların yuq itü dä bar. Läkin AQŞ bu mäs`älädä problemanı dialog aşa çişü pozitsiäsendä torğanlıqtan, başqa süzlär belän äytkändä Törkiäneñ xärbi çara kürüenä yäşel ut yandırmağanlıqtan, Tönyaq Ğıyraqqa Törek armiäse ütep kererme älegä bilgele tügel. Äxtäm İbrahim, İstanbul
XS
SM
MD
LG