Accessibility links

дүшәмбе, 5 декабрь 2016, Казан вакыты 01:35

Çallıda Rafis Kaşapov öleşçä ciñü yawlıy


2003 yılnıñ 9 martında Çallı TİÜe räise R. Kaşapovqa qarata cinayät eşe açıla. 26 martta anı qulğa alalar häm izolyatorğa yabalar. Annan, qarşılıq kürsätügä qaramastan, Qazanğa psixbol'nitsağa cibärälär. 2 ay däwamında şunda totıla. Rafis Kaşapov 2003-2004 nçe yıllarda berniçä tapqır törmägä yabılıp, mäxkämä qararı belän şulay uq berniçä tapqır azat itelä. Törmädä, psixik bol'nitsada kürgän ğazapların isenä alıp, Kaşapov, Rusiä finans ministrlığı qarşındağı federal' kaznaçılıkıñ baş idäräsen mäxkämägä birde. 16нчы aprel'dä - mäxkämä, Çallıda, Mörşidä Xäsänova qazıylığında ütte. Mäxkämägä jurnalistlardan ber keşe dä kertelmäde. Şulay da, irtänge säğät 10да başlanıp, töşke 12 dä tämamlanğan mäxkämä qararı şunduq küplärgä mäglüm buldı. Cawap totuçı yaq - Rusiä qaznaçılığınıñ baş idäräse şiqayät birüçe Rafis Kaşapovqa ruxi zıyan öçen 200 meñ sum tülärgä tieş. Kaşapov üze ruxi zıyannı 3 mln. sum belän bäyälägän ide. Mäxkämä tämamlanğaç, "Azatlıq" xäbärçese Rafis äfändegä berniçä soraw belän möräcäğät itte. Berençe soraw - mäxkämägä birüneñ säbäpläre, tarixı xaqında ide:

- Cinayät eşe açıluğa 2002 nçe yılnıñ 29 nçı mayında Çallı TİÜe ştabına höcüm yasalıp, minem qıynalu säbäpçe buldı. Qulğa alınıp törmädä bulu mine bik kiräkle bulğan däwalanudan mäxrüm itte. Qazandağı psixik bol'nitsada da däwalanu bulmadı. Monısı - mäsxäräläw buldı.

Çit illärdä, Amerikada, Awropada şundıy xoquq bozular bulsa, 3 mln.sum ğına tügel, 3 mln. dollar tülärgä yasarlar ide, dip, mäxkämä barışında da äyttem. 200 meñ sumğa rizasızlığımnı belderdem. Alğa taba da mäxkämä yullarınnan tuqtamabız, eşne ciñügä qädär alıp baraçaqbız."

Şulay itep, 200 meñne tülätü turında qarar bar. Qararnı cawap totuçı yaq appelyatsiägä birergä xoquqlı. Şul uq waqıtta Kaşapov yağı da 200 meñ sumnan riza bulmıyça, yuğarıraq mäxkämägä möräcäğät itä ala.

Ğafiulla Ğaziz, Çallı

XS
SM
MD
LG