Accessibility links

якшәмбе, 11 декабрь 2016, Казан вакыты 03:14

Ulyan ölkä xakimiäte häm maltabarları arasında kileşü tözelde


Lenin memorial' kompleksı 17-aprel'dä tulayım maltabarlar qaramağına birelgän ide. Zur foye törle şirqat'lärneñ tawarları kürgäzmäse belän qarşılıy. Kilüçelärgä 3 tügäräk östäl utırışı täqdim itelä. Tatarstan häm Ul'yan ölkäse arasında säwdä-iqtisadi elemtälärne kiñäytü turındağısı ber säğätkä soñraq başlanu arqasında, “Maltabarlar berläşmäseneñ xakimiät belän xezmättäşlege”nä bağışlanğan tügäräk östäldä dä öleşçä qatnaşu mömkinlege tabıldı. Utırışnı “Maltabarlıqnı üsterü departamentı direktorı Oleg Gulyaev alıp bardı. Ölkä Xökümäte ministrı İgor Tixonov üz çığışın xezmättäşlekneñ uñay küreneşlärenä häm problemalarına bağışladı. Anıñça, ällä ni zur problemalar yuq. Annan soñ kürenekle maltabar, “Opora Rossii” dip atalğan Räsäyküläm maltabarlar berlegeneñ Ul'yan bülekçäsenä nigez salğan Xämzä Yambaev, baytaq küñelsez misallar kiterep, mäsäläne ikençe yaqtan kürsätte. Anıñ ber ğibäräse çığışınıñ töp eçtälegen kürsätäder: “Älbättä, bez xakimiät belän bik ük qanäğät tügel: bez dä, alar da adäm balaları bit. Çağıştırıp qaraw da şunı raslıy: bıltır salım buyınça cinayätlär öçen 20 meñ maltabar häm 33 meñ türä mäxkämägä tartılğan. Läkin bezgä qapma-qarşılıq kiräkmi. İñ qıyını – bezneñ ğözerlärneñ sazlıqqa batırıluı”.

Anıñ süzen däwam itep, maltabar Rawil Kuzäxmätev ğarizalarnı qaraw waqıtına tögäl çikläw kertergä täqdim itte. Çönki, dide ul, ber imzanı yartı yıldan artıq kötärgä turı kilgäli. Bigräk tä İctimaği pulat äğzası maltabar Viktor Sergeevnıñ çığışı türä-türäçeklärneñ başbaştaqlığın açıq kürsätte: “Täräzälär” sanı kimi tügel – arta bara, här imza öçen tüläw taläp itelä. Mäsälän, “fonovaya konsentratsiä” turındağı käğäz 25 meñ rubl' tora. Şirkatemne terkäw öçen genä şundıy tüläwlärgä 300 meñ rubl' kitte. Kolorado qoñğızıday ürçegän türälärne tuydırıp bulmas, küräseñ”, - dide ul.

Çığışlar zarlanulardan ğına tordı dip tä bulmıy – anıq täqdimnär dä küp buldı. Şularnı qabul iteläçäk Ölkä xakimiäte belän kileşügä dä kertergä kiräk, didelär.

Kileşü – soñraq. Aña qadär Tatarstan häm Ul'yan ölkäse maltabarlarınıñ urtaq cıyılışı buldı. Anıñ aldınnan Bötendönya Tatar Kongressı wäkile Färit Urazaev bu oçraşunıñ maqsatın menä niçek añlattı.

Başta Tatarstannıñ häm Ul'yan ölkäseneñ iqtisadi häm investitsion mömkinlekläre belän tanıştıru buldı. Bu turıda qunaqlardan - Säwdä ministrlığı wäkile Aydar Abdraxmanov, xucalardan şundıyraq uq wazifalı İgor Yegorov süz tottılar. Baqsañ, ut kürşe ike töbäk arasında säwdä, investitsiä häm iqtisat buyınça mönäsäbätlär bik tä say ikän. İñ ğacäbe – Tatarstanğa Sember ölkäsennän kertelgän tawarlar, annan Sembergä kertelgännärgä qarağanda, 3 märtäbä kübräk ikän. Monı Tatarstannıñ, zur tözeleş alıp baruı arqasında, tözeleş materialların küp satıp aluı belän añlattılar. Ä Tatarstan barı tik yağulıq häm KamAZlar ğına sata ikän Sembergä. Ciñel sänäğät yağınnan xätta çigenü sizelä. Döres, monısı bolay da küzgä taşlana ide. Äytik, 7 – 8 yıl elek “qatıq”, “qaymaq”, “eremçek” süzläre yazılğan paketlar, “Zifa” isemle ker yuu poroşokları kürenä ide. Yuğaldılar. Säbäben farazlarğa ğına qala.

İgor Yegorov äytüençä, Sember älegä investitsiä yağınnan qalışa. Läkin Tatarstan ürnägendä bu eş tä cäyelderelä bara. Çexlar yärdämendä Pıyala zavodı tözelä, İdel aşa ikençe küper tözelep betsä, bezgä investitsiä ağılaçaq qına, dip tä östäde ul.

Avtonomiä räise Ramis Safin remontqa moxtac “Oktäber” kinoteatrı binasın safqa bastıruda da Tatarstannıñ yärdämenä ömet belderde.

Ölkäneñ eşmäkärlekne üsterü ministrı Vildan Zinnurov Tatarstan belän säwdä-iqtisadi xezmättäşlekne üsterü çaraları turında süz tottı, Tatarstan täcribäsen qullanu kiräklegenä dä basım yasadı.

Artaban baytaq maltabarlar üz şirqat'läre citeştergän tawarlar turında mäğlümat birep, xezmättäşlekkä çaqırdılar. Bu çığışlarnıñ näticälärenä ömetlänäse genä qala. Şunısı ğibrätle: barısı da tawar täqdim itälär, satıp alırğa teläk belderüçelär isä kürenmäde.

Soñnan Ul'yan ölkäse Xökümäte belän Keçe häm urta maltabarlarnıñ ğomumräsäy oyışması “Opora Rossii”neñ Ul'yan bülekçäse arasında Kileşü qabul itelde. Aña gubernatornıñ urınbasarı Aleksandr Pinkov häm bülekçä räise Anatoliy Sağa qul quydılar.

Ayrat İbrahim, Sember

XS
SM
MD
LG