Accessibility links

шимбә, 3 декабрь 2016, Казан вакыты 09:52

Omskida Dinä häm Rafael Latıypovlar bulıp kittelär


Tatarstannan çittä yäşäwçe tatarlarnı bügengä qädär tatar itep cırlarıbız-moñnarıbız saqlap kilä disäk, yalğış bulmas. Cirle xalıq öçen Tatarstannan yäki Başqortstannan artistlar kilü çın mäğnäsendä bäyrämgä äylänä. Şundıy cır bäyräme uzğan comğa könne Omskida bulıp uzdı. Şähärdä zur konsert belän Dinä häm Rafael Latıypovlar bulıp kittelär. Äytergä kiräk, alarnıñ konsertın oyıştıruçılar, zalda tamaşaçı bulırmı ikän dip, eşkä alınırğa berniqädär şiklänep tä torğan idelär. Çönki, Omskida küptän tügel genä, şähär xalqın därräw quzğatıp, Aydar Galimovnıñ häm Salawat Fätxetdinovnıñ konsertları bulıp uzğan ide. Ämma şiklänülär urınsız buldı, Omskiğa berençe genä kilüläre bulsa da, Latıypovlar konsertına xalıq küpläp kilgşçn ide. “Malunsev” isemendäge mädäniät sarayında buş urın qalmadı diärgä bula. Latıypovlar konsertı Omskida bulğan başqa konsertlardan berniqädär ayırılıp ta tordı, ul säxnäläşterelgän küreneş räweşendä, cır-iyüllär belän ürelep bardı, yäş başqaruçılar küp buldı. “ Bezneñ süzlärebezne añlarlar mikän, seber yağında dialekt başqaçaraq bit dip, borçılğan idek”,- di Dinä Latıypova.

Tamaşaçılar arasında yäşlär dä küp buldı. Tatarça belü-belmäwenä qaramastan, ber genä keşe dä konsertqa qarata rizasızlıq beldermäde, artistlarnıñ här çığışın köçle alqışlar belän qarşıladı. Konsert tämamlanğannan soñ, artistlarğa räxmätlären belderüçelär dä küp buldı. Çığışı belän Başqortstan yağınnan bulğan Rim Äxmätgäräev “Min ber genä konsertnı da qaldırmıym. Älbättä, alarnıñ barsı da uñışlı bula, küñelgä kerep qala, dip äytep bulmıy. Ä bügenge konsert iskitkeç buldı. Min räxätlänep yal itep utırdım. Cırçılarğa quşılıp cırlıysım, biüçelär yanına töşep, biisem kilde. Räxmät, şundıy matur programma belän kilgännärenä”, - dide.

Omskida ğına tügel, Tömän, Novosibirski, Prokop'yevsk şähärlärendä dä Latıypovlarnıñ konsertları uñışlı uzdı. Tatar cırları şähärlärneñ mädäniät saraylarında da, tatar awılları klublarında da yañğıradı. “Tömän ölkäseneñ Äsän awılında quyğan konsertqa xalıq yaqın-tirädäge 9 awıldan kilgän ide. Bu awıllarda tatar mäktäpläre yuq, balalar tatarça naçar belälär, bötenläy belmäwçelär dä bar ikän. Konsert barışında bez, xalıqnıñ yotlığıp cır tıñlap utırğanın, añlamasalar da söylägännärne iğtibar belän tıñlağannarın kürdek. Tatar moñnarın xalıqqa citkerü missiäbezneñ kiräk ikänlegenä tağın ber qat inandıq” - di Rafael' Latıypov.

Dörestän dä, konsertqa kilgän xalıq, tatar cırları tıñlap, üzeneñ tatar ikänlegen qabat isenä töşerde, cır -moñ saqlanğanda, millätebezneñ saqlanıp qalaçaqlığına ışandı.

Yuğaltmıyça cır-moñnarnı saqlıyq

Här keşeneñ yöräk türendä.

Mayaq bulıp, yul kürsätep torsın

Millätemneñ barır yulında.

Bu şiğri yullar Seber yağında icat itüçe Gölfizär Abdraxmanovanıñ 2003 yılnı basılıp çıqqan “Seber yağım” digän kitabınnan alındı.

Saniä Mirxaleeva, Omski

XS
SM
MD
LG