Accessibility links

пәнҗешәмбе, 8 декабрь 2016, Казан вакыты 08:57

Qazanda Bez naçar yullarğa qarşı aksiäse tämamlandı


Tatarstan başqalasında yullar mäs’äläse inde küptännän iñ awırlarnıñ berse bulıp tora. Bu xaqta bik küp bäxäsläşälär, törle çaralar kürälär. Menä şuşı könnärdä genä Qazanda şähärneñ cimerek yullarına qarşı çirattağı çara ütte. Bez naçar yullarğa qarşı aksiäsen Uñ köçlär berlegeneñ Tatarstan bülekçäse oyıştırdı. Çara 11 aprel’dä başlandı başqalanıñ Mäskäw uramında uzdırılğan fleş-mob çarası belän başlanıp kitte. Çärşämbe, 18 aprel’dä isä, säğät kiçke 6da Qazannıñ Mäskäw dambası dip atalğan küperennän ber törkem maşinalarnıñ qıçqırtıp uzuı belän tämamlandı. Aksiäneñ bu öleşenä şähärneñ başqa maşina yörtüçelär dä quşılıp, 18 sekund däwamında cimerek yullarğa qarşı üzläreneñ timer duslarınıñ tawışın işetterä aldı. Xäyer, oyıştıruçılar äytüençä, älege çara aksiäneñ xalıqqa bäyle öleşe genä tämamlanuı ikän. Xäzer töp eş xökümättä, Qazan şurası häm Däwlät Dumasında däwam itäçäk.

Ber atna däwam itkän çaranıñ niçek uzuı xaqında bez Uñ köçlär berlege respublika bülekçäseneñ başqarma direktorı urınbasarı Anastasiya Gordeevadan soraştıq.

Bezneñ promouterlar, yegetlär şähärneñ maşinalar küpläp cıyılğan cirlärdä eşlädelär. Alar bezneñ taläplär belän kileşüçelärgä zäñgär tasmalar tarattı, yullarnıñ sıyfatın yaxşırtu häm respublikada, Qazanda alarnı tözekländerügä kitkän aqçalarnı xalıq küzätüe mömkinlegen taläp itkän möräcäğätkä imzalar cıydı. Älegä bezneñ näticälär bik tögäl tügel, böten aksiädä qatnaşuçılar äle xisapların citkermäde. Läkin şulay da, 5-6 meñnän dä artıq imza cıyılğan dip äytep bula. Kiläçäktä bu imzalar şähär Şurasında häm respublika parlamentına tapşırılaçaq. Älbättä bu ber genä märtäbä ütkärelä torğan çara tügel, kiläçäktä bez şuşı yünäleştä eşçänlekne alıp barırğa cıyınabız

Älbättä, yullar, alarnıñ sıyfatın ber köndä genä, ber-ike çara ütkärep kenä yaxşırtıp bulmıy. Alay da, mondıy aksiälärneñ faydası yuq tügel. Menä Bez naçar yullarğa qarşı çarasınıñ başında Mäskäw uramında ütkärgän fleş-mob ta xakimiätneñ iğtibarınnan töşep qalmadı kebek. Ällä oçraqlı räweştä, ällä inde çınlap ta aksiäneñ näticäse, läkin bu bik cimerek häm küptännän tözekländerügä moxtac uramnı remontlıy başladılar.

Gölnaz İlgizär

XS
SM
MD
LG