Accessibility links

пәнҗешәмбе, 8 декабрь 2016, Казан вакыты 05:20

Rusiägä yä BDBğa oçasızmı? Saq bulığız: Yaña xisap


Rusiä häm elekke Sovetlar Berlege illärenä oçqıç belän baru qurqınıç bulıp qala. Rusiädä oçqıçlar Afrikadan ike märtäbä yışraq häläkätkä oçrıy. Dönyadağı sannar belän çağıştırğanda – Rusiä häm BDBda oçqıç häläkätläre 13 märtäbä kübräk. Bu xaqta bez Xalıqara Hawa Transportı Assosiasiäse xisabınnan beldek.

Genevada urnaşqan bu oyışma, oçqıçlarnıñ yış häläkätkä oçrawnıñ säbäpläre itep – naçar hawa şartları, elemtä problemaları häm xezmätkärlärneñ belem däräcäseneñ tübän buluın atadı.

Rusiädä oçqıç sınawlarında qatnaşqan elekke oçuçı Vadim Bazıkin, Rusiädä hawada iminlek qağidäläreneñ ütälmäwe belän kileşmäsä dä, hawa transportı ölkäsendä üzgäreşlär kiräklegen tanıdı:

"Miña qalsa bolar naçar äzerlänüdän kilä, misal öçen trenajerlarda şöğellänü – keşelär kilep söyläşep tora da, taralışa. Yaxşı trenajerlar da yuq. Annarı Rusiädä bezneñ naçar ğadätebez bar – böten äyberne duslıq aşa eşläw. Eştä duslıq bula almıy, qağidälär bozılsa – berençe tapqır aqçalata cäza bulsa, ikençe tapqır inde keşene eşennän alırğa kiräk."

Rusiäneñ aqrınlap yaña oçqıçlar aluına qaramastan uzğan yılda zur faciğalar buldı. Rusiäneñ Tu-154 oçqıçı Ukrainada häläkätkä oçrap anda bulğan barlıq 170 yulçı häläk buldı. İrkutskida oçqıçta yanğın çığıp 120 keşe häläk buldı. Älbättä, Bäysez Däwlätlär Berdämlegenä kergännär illärneñ barısında da xällär ber törle naçar tügel, di Vadim Bazıkin:

"Qazaxstanda xällär yaxşı çönki alarda bu tarmaqnı Britannar qarıy. Ukrainağa da yaxşı bäyä birälär."

Küptän tügel Rusiäneñ 10 hawa şirkätenä Yevropağa oçu tıyılğan ide. Alar arasında "Tatarstan" hawa şirkäte dä bar. "Tatarstan"nıñ ike oçqıçında – cirgä yaqınlaşunı kürsätkän cihazlar bulmağan. Qara isemlekne Berläşkän Yevropa İdaräse tözegän ide. "Tatarstan"nan tış anda "Russkoe Nebo", "Atlant-Soyuz", "Utair" kebek bilgele zur hawa şirkätläre bar.

Alsu Qormaş
XS
SM
MD
LG