Accessibility links

шимбә, 10 декабрь 2016, Казан вакыты 23:31

Raketalardan saqlanu sistemasın tikşerü öçen Pentagon xucası Mäskäwgä kilä


Kiläse düşämbedä Mäskäwgä Amerika Quşma Ştatlarınıñ saqlanu ministrı Robert Gates kilä. Anıñ Rusiä räsmiläre belän söyläşüläre üzägendä Washingtonnıñ bäxäsle planı - Üzäk Yewropada raketalardan saqlanu qalqanınıñ qayber öleşlären urnaştıru niäte toraçaq dip kötelä. Älegä Mäskäw amerikan yağınıñ bu mäs''älädä xezmättäşlek itü täqdimen kire qaqan ide.

Robert Gatesnı Mäskäwdä şaqtıy çetrekle söyläşülär kötä. İlneñ yaña saqlanu ministrı, Anatoly Serdükov belän oçraşuda ul Rusiäneñ Üzäk Yewropadağı amerikan plannarına qarşılığın yomşartırğa tırışaçaq. Washington, Pol''şa belän Çexiädä urnaştırılaçaq saqlanu qalqanı qorılmalarınıñ eşe Rusiägä tügel, ä totrıqlı citäkçelek bulmağan İran häm Tönyaq Koreä kebek illärgä qarşı yünäldereläçäk dip kilsä dä, Mäskäw räncetelgän itep näq menä üzen sizä häm moña tieşle cawap qaytaru belän yanıy.

Citmäsä, küptän tügel genä Pentagon xucası üzeneñ ber çığışında Rusiäne qurqınıç yanıy alırlıq illär rätenä kertkän ide, monı da Mäskäwdäge citäkçelek bik awır qabul itep, üzen Amerikanıñ doşmanı itep bilgeläwgä tiñläde. Gates atağan isemlektä Qıtay, İran, Tönyaq Koreä kebek illär bar ide.

Şuşı süzlär suğışı ike il arasındağı mönäsäbätlärneñ şaqtıy ğına suınuın çağıldıra, Rusiädä dä, Quşma Ştatlarda da küplär xäzer yaña "salqın suğış" turında süz alıp bara. Monıñ sürätendä raketalardan saqlanu sistemasın kamilläşterü plannarı xärbi genä tügel, ä zurraq säyäsi ber problemağa äylänep kitä ala.

Rusiäneñ kürenekle xärbi belgeçe Aleksandr Goltz xätta, qarşılıqlarnıñ tiränäyüe Mäskäw öçen faydağa bula ala, yäğni Rusiä citäkçelege monı maxsus quyırta digän fiker belderä:

"Problema biredä şunda ki, ul inde küptän säyäsi ber dairägä küçerelde. Rusiä üzeneñ nindi dä bulsa ber ölkädä räncetelüen teli. Häm Quşma Ştatlarnıñ raketalardan saqlanu ölkäsendäge bik ük aqıllı bulmağan säyäsäte Rusiägä näq menä şundıy räncelü häm başqa ber ilneñ doşmanlığına törtep kürsätü mömkinlegen birä. Rusiäneñ xäzerge citäkçelege fikerençä, bu ilneñ abruıyn kütärü häm böyek mämläkät statusın qaytaru mömkinlegen birä", di Aleksandr Golts.

Mäskäw Washingtonnıñ bu ölkädäge xezmättälek täqdimen inde kire qaqtı. NATO-Rusiä şurasınıñ 19-nçe aprildä Brüsseldä uzğan çirattağı oçraşuında şuşı mäs''älä qaralğan ide, ämma Rusiäneñ NATOdağı ilçese general Totsky belderüenä qarağanda, Mäskäw haman qarşı bulıp qala birä:

"Bez Yewropada "salqın suğış" çorınnan soñ berençe märtäbä yaña strategik element urnaştırıluğa şulay ciñel genä qarıy almıybız. Bez şundıy citdi qararlarnı beryaqlı ğına qabul itügä qarşı çığabız", di Rusiäneñ NATOdağı ilçese.

Atnakiç amerikannarnıñ şul saqlanu qalqanı ölkäsendä bergäläşep eşläw täqdimen berençe vitse-premyer Sergey İvanov ta kire qaqtı.

Kärim Kamal
XS
SM
MD
LG