Accessibility links

Кайнар хәбәр

Çallıda Amerika häm İran wäkilläre


Çallı yuğarı uqu yortlarına çit il dairäläreneñ iğtibarı yıldan-yıl arta bara. Biredä Albaniä, Fransiä wäkilläre şaqtıy yış bulıp toralar. Amerika Quşma Ştatları mäğärif xezmätkärläre Çallıdağı injener-iktisad akademiäsenä berençe säfärlären yasadılar. 19 nçı aprel' könne qunaqlarnı akademiäneñ prorektorı Vladimir Şibakov qarşı aldı, çönki älege uqu yortınıñ citäkçese Äsfändiär Xayrullin eşlekle säfärdä ide. İnjenerlar akademiäsenä kilüçe Djoel Erikson "Xalıqara mäğäriftä Amerika kiñäşläre" digän oyışmanıñ direktorı bulıp tora. Oçraşu barışında Erikson äfände mondıy fikerlären äytte:

- Böten Rusiädän iñ yaxşı studentlarnı, uquçılarnı, aspirantlarnı barlaw belän mäşgül'bez. Kiläçäktä alarnı AQŞta uqıtırğa cıyınabız. Tatarstan alğa kitkän däwlät, şunıñ öçen dä biregä kildem. Xalıqara almaşularnı finanslaw turında Rusiä subyektı qarar qabul itte.Bu minem eş ğämälemdä berençe oçraq. Bez, Tatarstan mäğärif ministrlığı belän tığız elemtädä eşlibez,- dide Djoel Erikson.

Amerikannar kitep ber säğät waqıt uzdımı ikän, Çallı injenerlıq akademiäsenä Rusiädäge İran ilçeseneñ fän, mäğärif häm mädäniät buyınça kiñäşçese Äxmät Montazeran kilep töşte. Anı dönya mädäniäte institutı rektorı İñgel Tahirov ozata kilde. İran ilçelege wäkileneñ Çallığa kilüe tübändägedän ğibärät: studentlarnı almaşu programmasın äzerläw. Älege programmağa studentlarnıñ xezmät täcribäsen oyıştıru, bergäläp konferensiälär häm proyektlar buldıru, şulay uq cäy köne studentlarnıñ yal waqıtların bergäläp ütkärü çaraları qaralğan. Biredä, Qazanda, iyün ayında Tatarstan-İran xalıqlarınıñ mädäniäte, sivilizatsiäse xaqında fiker alışu, konferensiä bulaçağı da bäyän itelde. Şuşı oçraşu barışında ber ük studentlar Amerika wäkilen dä, İran wäkilen dä tıñladılar. Xalıqara matbuğat Amerika-İran mönäsäbätlärendäge kierenkelek xaqında älegä qädär citkerep tora. Şuşı illärneñ Watandaşları sanawlı säğätlär eçendä ber uqu yortında bulıp kitüläre älbättä, iğtibarğa layıq. Ni öçen? Studentlar qaysı ilneñ programmasın, wäğdälären saylap alır. Menä monısı qızıqlı. Xäzerdän ük, "Xalıqara belem birüdä Amerika kiñäşläre" oyışması proyektın, şunda uq İran programmasın yaqlawçı studentlar barlıqqa kilgän.

Ğafiulla Ğaziz, Çallı

XS
SM
MD
LG