Accessibility links

шимбә, 10 декабрь 2016, Казан вакыты 21:44

Rusiä Xökümäte Apparatı citäkçese Sergey Narışkin Qazanda


Comğa könne Qazanda könneñ berençe yartısında BDB häm Könçığış Awropa illäreneñ studentlar sportı problemalarına bağışlanğan Xalıqara fänni-ğamäli cıyılış açıldı. Monda dönyanıñ 30 ğa yaqın ilennän studentlar sportı federatsiäläre citäkçeläre cıyılğan ide. Fiker alışuda Xalıqara studentlar sportı berlege Prezidentı Djordj Killian citäkçelegendäge delegatsiä dä qatnaştı. «Korston» üzägendä ütkän bu çaranı açu tantanasında Prezident Mintimer Şäymiev, Premyer-ministrı Röstäm Miñnexanov, Rusiä Xökümäte Apparatı citäkçese Sergey Narışkin, Qazan merı İlsur Metşin, Rusiä studentlar berlege prezidentı Oleg Matıtsin da qatnaştı. Cıyılışta şulay uq Xalıqara sport bäyrämen Tatarstanda uzdıru mömkinlege turında süz çıqtı. Rusiä vitse-premyerı Sergey Narışkin Qazannıñ 2013 yılda uzaçaq Xalıqara cäyge Universiadanı qabul itärgä mömkinlege yuğarı dip sanıy häm Tatarstan citäkçeläre häm Rusiä Xökümäte bu xoquqnı alu öçen köräşäçäk dip ışandırdı. FISU prezidentı da altı yıldan Qazannıñ älege däräcäle yarışlar başqalası bulu mömkinlege zur buluın äytte. Äytergä kiräk, Rusiä xökümäte apparatı citäkçese Sergey Narışkinnıñ Qazandağı räsmi eş säfäre bik tığız uzdı. Annan soñ ul Qazan ratuşasında tügäräk östäl söyläşüendä qatnaştı. Söyläşü xakimiät reforması, anı ütkärüdä federal' täcribä häm Rusiä töbäklärendä üzençäleklär xaqında bardı. Konferensiädä Rusiäneñ İdel häm Ural buyı töbäklärennän 60 lap cirle Xökümät wäkilläre dä qatnaştı. Utırışnıñ plenar öleşennän soñ, qatnaşuçılar berniçä seksiägä bülenep administrativ reforma, däwlät idäräse mäs’äläläre centekläp tikşerde. Şunnan soñ Narışkin "Qazan orğanik sintez" basseynında uzaçaq veterannar arasında yözü buyınça XVI Rusiä çempionatı yarışların qaradı. Bilgele bulğança, Sergey Narışkin Rusiä yözü federatsiäse Prezidentı da bulıp tora. Mäskäwgä kitär aldınnan isä Rusiä Xökümäte Apparatı citäkçese respublikanıñ Çallı şähärenä barıp, Fiat maşinaların yasaw liniäsen açu tantanasında qatnaştı. Gölnaz Şäyxetdin

XS
SM
MD
LG