Accessibility links

пәнҗешәмбе, 8 декабрь 2016, Казан вакыты 07:00

Törkiädä xristian näşriätına höcüm buldı


Bu atnada törek cämäğätçelege ilbaşı saylawları belän mäşğül bulğan ber çaqta Törkiäneñ Malatya qalasında xristian dine belän bäyle basmalar taratuçı näşriät yortına yasalğan xöcüm – kötelmägändä Törkiädäge kön tärtiben üzgärtep cibärde.

Näşriyät yortında eşläwçe qulları-ayaqları bäylängän häm awızları tasma belän yabılğan 3 keşe buğazları kiselep üterelgän. Däwam itelüçe tikşerü qısalarında 10 keşe qulğa alındı. Eçke eşlär ministrı Abdulkadir Aksu, waqiğanıñ böten yaqları belän tikşerelüen belderep, mondıy waqiğalar belän ildä tartqalaşu häm butalçılıq kiterep çığarırğa teläwçelärneñ maqsatlarına ireşä almayaçağına basım yasadı.

Missionerlıq eşçänlegen alıp barğan näşriät xezmätkärläre moñarçı da yanawlarğa duçar buluın belderde. Vilayät başlığı Halil İbrahim Daşöz isä näşriätneñ iminlek oyışmasına yanaw aluları turında xäbär itmäwen häm tän saqçısın soramawın belderde.

Törkiädäge Protestant çirkäwläre berlege başlığı İhsan Özbek jurnalistlarğa yasağan açıqlawında ozaq waqıttan birle rasaçılıq häm xristianlıqqa qarşı näfrät orlıqlarınıñ çäçelüen häm Törkiäneñ zur ber yanaw astında buluın alğa sörde.

Malatyadağı bu waqiğağa rizasızlıq belderep İstanbul häm Anqarada uram cıyınnarı ütkärelde. Üterelgän 3 keşedän ikese xristian dinen qabul itkän törek watandaşı, berse alman ide.

XS
SM
MD
LG