Accessibility links

Кайнар хәбәр

Törek yulbaşçısı xatın-qız bula alamı?


Uzğan atnanıñ düşämbe könendä Törkiä ilbaşın saylaw barışı başlandı. Namzätlek öçen möräcäğätlär 25 aprel çärşämbe könne säğät tönge 12-gä xätle qabul iteläçäk. Annan soñ 20 kön eçendä parlamentta saylawlar ütkäreläçäk.

Premyer-ministr Recep Tayip Erdoğan älegä ilbaşı öçen namzät bulaçaqmı yuqmı ikänlegen beldermäde, barı tik monıñ partiyäseneñ parlamenttağı cıyılışı ütkäreläçäk 24 yäki 25 aprel könne açıqlanaçağın äytte. Erdoğan citäklägän AQ partiyäneñ Üzäk Qarar häm İdarä Şurası isä xökümät başlığına ilbaşı namzäten bilgeläw öçen tulı wäqalät birde.

Şul uq waqıtta törek matbuğatında çıqqan qayber xäbärlärgä qarağanda, Ğadälät häm qalqınu partiyäse AKP ilbaşı öçen xatın-qız däwlät ministrı Nimet Çubukçunı täqdim itärgä cıyına. Xoquqçı bulğan häm zamança küreneşe, dönyavi fikerläre belän bilgele bulğan bu xanım premyer Erdoğannıñ iñ ışanıçlı keşelärennän berse bulıp sanala.

Säyäsi küzätüçelär fikerençä, Erdoğan xökümätendä xatın-qız häm ğailädän cawaplı däwlät ministrı wazifasın başqaruçı Nimet Çubukçu, Törkiäneñ berençe xatın-qız ilbaşı bulıp saylanğan oçraqta, häm başyawlıqlı xäläl cefete bulğan Erdoğan krizisı xäl itelgän bulaçaq, häm dä Erdoğan üze citäklägän oçraqta AQ partiyäneñ yıl axırında ütkäreläçäk ğomum saylawlarda tağın da köçleräk räweştä qatnaşu mömkinlege tuaçaq.

Şul arada Erdoğannıñ ilbaşı wazifasın başqaruına qarşı bulğan törkemnär uram cıyınnarın ütkärerdä däwam itterä. Moñarçı Ankarada ütkärelgän Cömhüriyät uram cıyınınıñ oxşaşı 29 apreldä İstanbulda uzdırılaçaq. 100-dän kübräk ictimaği oyışma häm törle cämğiyät yaqlap çıqqan uram cıyınında Törkiäneñ dönyavi ber däwlät buluına basım yasaluı kötelä.

XS
SM
MD
LG