Accessibility links

шимбә, 10 декабрь 2016, Казан вакыты 16:01

Ukraina prezidentı häm premyer-ministrı kileşügä yaqınlaşa


Bügen Kiev mäydannarına yañadan xalıq ağıldı. Ber yaqtan prezident Viktor Yuçenko yaqlılar, ikençe yaqtan – premyer-ministr Viktor Yanukoviç tarafdarları üzläreneñ uram cıyınnarın uzdırdı. Xakimiät büleşü nizağınıñ azağı kürenäme?

Ukrainadağı säyäsi wazğiät 3 atnağa körçekkä terälde. Häm äle genä – nizaq çişelügä taba bara digän işarälär päydä buldı. Comğa könne prezident Yuçenko, ägär dä deputatlar qayber säyäsi reformalarğa rizalaşsa, parlamentnı taratu qararın kiçekteräçägen belderde. Köndäşe Viktor Yanukoviç belän oçraşqannan soñ, prezident jurnalistlarğa menä nilär äytte:

"Prezident üz färmanın kiçekterergä äzerme? Ägär dä qısqa waqıt eçendä qatği säyäsi kileşülärgä ireşelsä, min äzer."

Parlamentnı taratıp saylawlarnı 27 mayğa bilgeläw turındağı färmanın prezident 2 april könne iğlan itte. Yuçenko Yanukoviçnı qanunsız räweştä deputatlarnı anıñ koalisiäsennän üzenekenä tartuda ğäyepläde.

Yanukoviç färmannı qanunsız dip atadı häm anı ütäwdän baş tarttı. Xäzer Yuçenko, deputatlarğa parlament eşlärenä 10-12 qanuni üzgäreş kertergä dip basım yasıy.

Yanukoviç kiçä uram cıyını uzdırğan tarafdarları aldına çığıp, kiläse atnada kileşügä ireşüne wäğdä itte:

"Prezident Yuçenko belän böten añlaşılmawçanlıqnı kiläse atnada çişep beterergä kileştek. Prezident bügen üz färmanınnan çigenügä äzer bulğanın häm kileşü telägänen belderde, monıñ öçen bezgä nizaqqa säyäsi häm qanuni çişeleş tabarğa kiräk."

Ofıqta inde kileşügä yaqınlaşu kürensä dä, Kiev uramnarına bügen meñlägän keşe çıqtı. Biredä bu nizaqqa bik qatnaşı bulmağan elekke premyer Yulia Tymoşenkonı yaqlawçılar da bar. 20 meñ keşelek uram cıyını aldında Tymoşenko, saylawlarnı kiçekterü kebek kenä çigeneş bulırğa mömkin, yaña tawış birü barıber bulaçaq, dide:

"Ul ber nindi färmanın da ğamäldän çığarmayaçaq. Yanukoviç klanı da – yaña saylawlar – nizaqtan çığunıñ berdänber yulı ikänen añlağannan soñ, prezident tawış birüne ikençe waqıtqa ğına küçeräçäk."

Prezident Yuçenko färmanınıñ qanunilığı xäzer Ukraina Konstitusiä mäxkämäsendä tikşerelä. Prezident häm premyer-ministr ikese dä, mäxkämä qararı belän riza bulaçaqların belderde.

Alsu Qormaş
XS
SM
MD
LG