Accessibility links

шимбә, 3 декабрь 2016, Казан вакыты 18:49

Atambayev: Qırğızstanda nizaqnı konstitusion reforma ğına xäl itä ala


Qırğızstan premyer-ministrı Almaz Atambayev, ildäge säyäsi krizisnı çişüneñ berdänber yulı – konstitusiägä üzgäreşlär kertü, dip belderde. Atambaev şulay uq Azatlıqqa birgän äñgämäsendä 19 april könne uram cıyınnarı waqıtında bulğan köç qullanu öçen oppozisiäne cawapqa tartaçağı turında äytte.

Konstitusion reformalar, Atambayev süzlärençä, - nizaqnı xäl itüneñ berdänber yulı:

"Qırğızstanda totrıqlılıq urnaştıru öçen bez konstitusion reformalarnı azaqqa citkerergä tieş."

Üzgäreşlär ölgesen maxsus komissiä prezident Qormanbäk Bakievqa tapşıraçaq.

"Bez täqdim itkän ölge – xakimiätne 3 qanat arasında ber tigez bülä. Anda böten närsä bar. Anda xattä xezmätkärlär säyäsäte dä qaralğan. Prezident häm premyer-ministr ber bersenä kiñäşlär biräçäk. Moña parlament ta qatnaşaçaq. Kileşügä ireşüdä böten yaqlarnıñ qatnaşı bulaçaq. Bu ölgegä qarşı çığuçılar ämma üzläreneken genä qabul itergä teli."

Ämma Atambayev, oppozisiädäge säyäsätçelär belän söyläşülär uzdırırğa telägänen äytte. 11 aprildän birle oppozisiä köçläre Bişkäktä uram cıyınnarı uzdıra. Alar konstitusiägä üzgäreşlär kertüne, Bakievnıñ prezident urınınnan kitüen häm waqıtınnan alda yaña prezident saylawları ütkärüne taläp itä. Bakievnı noyaber ayında uram cıyınnarı waqıtında birgän wäğdälären ütämäwdä ğäyeplilär. 19 april könne Bişkäk uramnarında cıyılğan xalıq xökümät binasın saqlağan milisiägä taşlar häm şeşälär attı, 100gä yaqın keşe qulğa alındı. Atambayev süzlärenä qarağanda, alarnıñ berse genä äle dä törmädä qala:

"Berençedän, minem elekke tarafdarlarnıñ berse dä törmädä tügel. Alar anda eläkmäw yulların belä. Ämma ğäyebe tabılğan barısı da cäza alırğa tieş. Älbättä alarğa yulbaşçıları cäzadan qaçırğa yardäm itergä tırışaçaq, imanım kamil. Ämma bu cäza – kiläçäkkä sabaq bulaçaq. Keşelär, başqa keşegä yäki maşinağa taş atu – döres tügel ikänen, kibetlärne cimerergä yaramağanın añlarğa tieş."

Alsu Qormaş
XS
SM
MD
LG