Accessibility links

якшәмбе, 4 декабрь 2016, Казан вакыты 09:20

Çallıda Minzälä teatrı "Möhacirlär" spektaklen quydı


Mäxmüt Ğaläw tatar uquçısına "Bolğançıq yıllar", "Möhacirlär" romannarı belän bilgele. Äsärneñ soñğısın Fänil Galiev häm rejisser Rinat Äyupov Minzälä tatar teatrı artistları belän dramatik novella räweşenä kiterep, säxnädän kürsäterlek tamaşa yasadılar. Tarixi romannan eşlängän spektakl'neñ premyerası Çallınıñ S.Sadıykova isemendäge konsertlar zalında, 800 tamaşaçı qatnaşında ütte. 45 artist häm texnik xezmätkärneñ köçe kergän spektakl' ber genä kön bardı. Tamaşadan soñ teatr belgeçe Aygöl Äxmätğalieva belän berniqädär waqıt äñgämä qordıq. Aygöl xanım, "Minzälä teatrı kollektivı", "Möhacirlär"ne säxnäläşterep, ğälämät zur eş başqarğan, tarixi romannı 2 säğätlek säxnä telenä küçerü zur ostalıq sorıy. Bu eşne barısı da cirenä citkergän dide häm äydägez, anıñ fikerläreneñ däwamı:

- Romannıñ eçtälegenä tuqtalam. Waqiğalar 19нчы ğasır axırında bara. Tatar awıllarına çuqındıru digän afät kilä. Şunnan qaçıp, tatarlar Törkiä yaqlarına kitä, üzlärenä bäxet tabarğa omtıla. Böten citeşsezleklären, artistlarnıñ uynawın isäpkä alıp, avtor äytergä telägän ideyä nigezdä tormışqa aşqan, dip äytä alam. Kostyum häm säxnä bizäleşenä dä tel-teş tidererlek tügel. Artist Xafiz Xammatullin berüze 3 rol' başqarıp, tamaşaçınıñ küñelen ayuladı.

Minzälä teatrı artistları "Möhäcirlär" tamaşası belän tatar xalqınıñ çuqındırılu, küçenü häm tormışnıñ başqa problemaların bügenge kön yassılığına çığardı, dip sanıy teatr belgeçe Aygöl Äxmätğalieva.

Ğafiulla Ğaziz, Çallı

XS
SM
MD
LG