Accessibility links

шимбә, 10 декабрь 2016, Казан вакыты 11:54

Röstäm Miñnexanov Londonda Tatarstan belän tanıştıra


Tatarstannıñ premyer-ministrı Röstäm Miñnexanov bu könnärdä yänä säfärdä. Bu yulı ul Londonğa kitte. Anda ul Rusiä iqtisadıy forumında qatnaşa. 22 aprel’ könne britaniä başqalası Londonda üz eşen başlap cibärgän Rusiä iqtisadıy forumı bıyıl inde 10 märtäbä ütä. Anı Eventica kompaniäse firması oyıştıra. Firmanıñ citäkçese – inde küptännän Londonda yäşäwçe rus eşmäkäre. Äytergä kiräk, Älege forum bik ähämiätle häm möhim çara bulıp sanaldı. Anda Rusiä ministrları, xökümät wäkilläre, iñ bilgele, abruylı eşmäkärläre, iqtisatçıları, säyäsätçeläre qatnaşıp kilde. Zamanında anda ilneñ säyäsi häm iqtisadıy elitasına kergän eşmäkärlär Vladimir Potanin, Mixail Xodorkovskiy, RAO EES citäkçese Anatoliy Çubays, Rusiä prezidentınıñ elekkege kiñäşçese Andrey İllarionov, Rusiä timer yulları başlığı Vladimir Yakunin, Rosneft’ şirkäte citäkçese Sergey Bogdançikov häm başqa bik küplär qatnaştı. Rusiäneñ citäkçelege dä älege çarağa şaqtıy zur iğtibar birä ide. Anda dönyağa üzeñne täqdim itü öçen genä tügel, xakimiät wäkilläre belän aralaşu öçen dä kilälär ide. Forumda qatnaşuçılar sanı da şaqtıy, yıl sayın anda meñlägän keşelär cıyıla ide. Xäyer, bıyıl da forumda 2 meñ yarım keşe bulır dip kötelä. Monda kerü bäyäläre dä arzan tügel. Bu yulı mäsälän, forumda qatnaşırğa telägän här keşe 1410 funt sterling tülärgä tieş. Londondağı Rusiä iqtisadıy forumı şulay itep, dönyağa üz-üzen kürsätep, keşelärne qarap, elemtälär caylaw öçen şaqtıy möhim çara bulıp tora ide.

Läkin xäzer wazğiät üzgärergä dä mömkin. Bıyıl Londondağı forumğa Rusiädän kilüçelär sanı kimegän. Monıñ säbäbe dä bik citdi dilär – çarağa barunı Rusiä prezidentı tıyğan ikän. Vladimir Putin imeş, emigratsiädäge forumnı iğtibarsız qaldırırğa kiñäş itkän. Bu xaqta Vedomosti gäcite yazıp çıqtı. Xäyer, küp kenä aldan Londonğa baram dip yörgän, läkin soñğı könnärdä genä anda barudan baş tartqannar Mäskäw kremlennän bu xaqta nindi dä bulsa qarar buluın inqar itä. Alay da, şaqtıy ğına zur eşmäkärlärneñ häm xökümät äğzäläreneñ kinät kenä bik möhim häm kiçektergesez eşläre kilep çığuı küplärdä şik tudıra. Mäsälän, Londonğa barudan Rusiäneñ iqtisadi üseş ministrınıñ urınbasarı Kirill Androsov, prezident xakimiäteneñ idärä başlığı Arkadiy Dvorkoviç, iñ ere eşquarlar, zur kompaniälär, banklar citäkçeläre Petr Aven, Sergey Bogdançikov, Aleksey Mordaşov, Anatoliy Çubays häm başqalar baş tartqan, dip yaza newsru.com säxifäse.

Belgeçlär Rusiä xakimiätläreneñ Londondağı forumnı inqar itüneñ säbäplären Britaniä belän Rusiä arasındağı mönäsäbätlärneñ qatlawlanuı, dip sanasa, Rusiä citäkçeläre bezneñ iqtisadıy problemalarnı Londonda tügel, ä üzebezdä xäl itärgä kiräk, digän fikerne belderä. Şuña da, bar iğtibarnı däwlät räsmiläre dä, eşmäkärlär dä, iqtisatçılar da cäy könnärendä Sankt-Peterburgta uzaçaq iqtisadıy forumğa birergä cıyına. Näq menä şunda oyıştıruçılar Rusiä citäkçelegen dä, anda xätta Vladimir Putin da bulır dip kötelä, dönyanıñ iñ ere kompaniäläre wäkillären dä, iqtisat belgeçlären häm eşmäkärlärne cıyarğa wäğdä itä.

Läkin Londonğa barudan qurıqmawçılar da az tügel. Şular arasında Tatarstan wäkilläre. Respublika premyer-ministrı Röstäm Miñnexanov citäkçelegendäge wäkilçelek Londonğa uza torğan X Rusiä iqtisadıy forumında qatnaşudan baş tartmadı. Äytergä kiräk, bu tatarstanlılarnıñ berençe genä Britaniägä säfäre tügel. Respublika anda barıp, üzen inde täqdim itep tä qaytqan ide. Londonda xätta Qazannan Ğäliäskär Kamal isemendäge teatrı tamaşalar kürsätep qayttı. Menä bu yulı da Tatarstan wäkilläre üzläreneñ mömkinçeleklären dönyağa tanıtırğa niätli. Röstäm Miñnexanov forumnıñ plenar öleşendä çığış yasadı. Ğomumän forumda cıyıluçılar Rusiägä investitsiälär cälep itü, ildä ipoteka, energetika şirkätläre, aksiälär bazarı mäs’äläläre qaraldı. Monnan tış, Tatarstan wäkilläre isä forumğa cıyılğan eşmäkärlär, törle kompaniälär wäkilläre belän oçraşıp, respublika, anıñ iqtisadıy mömkinleklären täqdim itä, xezmättäşlek turında söyläşülär alıp bara.

Gölnaz İlgizär

XS
SM
MD
LG