Accessibility links

Кайнар хәбәр

Qazanda İdel buyı yazuçıları häm tärcemäçeläreneñ forumı ütä


Äle şuşı aralarda ğına Qazandağı “Mäğärif” näşriätendä Rawil Boxarayıwnıñ Altın Urda çorına bağışlanğan “Zolotıyı stupeni” äsäre basılıp çıqtı. Mondıy äsärlärneñ dönya kürüe çın waqiğa. Tuqay, Cälil äsärläre rus häm başqa tellärgä tärcemä itelsä dä, tatar klassikasın olı mäydanğa çığaru eşe äle bik sülpän bara. Şağir, “Qazan utları” jurnalı baş möxärrire Rawil Fäyzullinnı tıñlap kitik:

Tatarstanda 90nçı yıllardan soñ tärcemä itü eşe tuqtatıldı diärlek. Başqa töbäklärdä dä bu eş bik sülpän bara. Ämma milli ädäbiätne tärcemä itü ixtiacı bar häm bulaçaq. Şuña da älege forum şuşı zur eşne başlap cibärergä yärdäm itäçäk dip uylıybız.

Rusiädä milli ädäbiätne tärcemä itü ixtiacı inde küptän tuğan. Çönki näq sıyfatlı tärcemä bulmaw säbäple, milli respublikalarnıñ yazuçıların belüçelär az. Düşämbe könne Qazanda açılğan İdel buyı yazuçıları häm tärcemäçeläre forumında Mäskäw, Başqortstan, Çuwaşiä, Mordoviä, Mariy Eldan kilgän icat ähelläre qatnaştı. Rusiäneñ şiğriät akademiäse citäkçese Valentın Ustinov älege forumnıñ bik ähämiätle buluın belderde. Rusiädä mondıy çara berençe tapqır uza häm anı Tatarstannıñ mädäniät ministrlığı häm Yazuçılar berlege oyıştıra. Tärcemä eşeneñ qatlawlı baru säbäplären yazuçı Rafael' Mostafin bolay bilgeläde:

İñ möhime tärcemäçelär yağınnan milli ädäbiät belän ixlas qızıqsınu kiräk. İkençe urınğa quyar idem - aqça mä’säläsen. Tärcemälärne bastıruğa matdi yärdäm kiräk, ä monıñ öçen xakimiätneñ iğtibarı kiräk. Häm tağın ber möhim närsä - ul tärcemä itelgän äsärneñ eçtälege. Süzne tügel, fikerne, xisne tärcemä itärgä kiräk. Tatar keşese Tuqaynı añlağan kebek, başqa millät keşesenä dä anı näq şulay citkerergä kiräk.

İdel buyı yazuçıları häm tärcemäçeläreneñ forumı çärşämbe könne Arçada şiğriät bäyräme belän tämamlanaçaq.

Al'bina Zäynulla

XS
SM
MD
LG