Accessibility links

шимбә, 10 декабрь 2016, Казан вакыты 08:03

G.Qamal teatrında “Tirän tamırlar”


G.İbrahimovnıñ tuuına 120 yılğa bağışlanğan kiçäne Yazuçılar berlege räise İlfaq İbrahimov alıp bardı. Çaranı Mädäniäт ministrı Zilä Wälieva açtı. Anda Mäskäwdän “Drujba narodov” jurnalınıñ baş möxärrire Aleksandr Ebanoidze, Rusiäneñ şiğriät akademiäse prezidentı Valentın Ustinov, Çuwaşiä, Udmurtiä, Mariy-el' respublikalarınnan delegatsiälär kilgän. Şulay uq G.İbrahimovnıñ tuğan yağınnan Başqortstannıñ Awırğazı rayonı, Soltanmorat awılınnan ädipneñ yaqınnar häm tuğannarı bar ide.

Tantanalı kiçä G.İbrahimovnıñ tormış häm icat yulına bağışlanğan çığışlar belä başlanıp kitte. Älegäçä G.İbrahimov mirası Sovet ideologiäse qısalarına turı kilgän yaqları iğtibarğa alındı, ä xäzer ädäbiätçılar niçek bar, şulay qabul itep, analizlau yulında. Bügenge ädäbi protsesslar häm G.İbrahimovnıñ icadi mirasın yañadan öyränü, barlaw xaqında akademik Mirqasıym Gosmanov söyläde:

XX ğasırdağı küreneşlärgä, şäxeslärgä yañadan bäy birergä tırışabız. Läkin qayberäwlärne täqätläsäk tä, alarnıñ eşçänlegendä kimçeleklär ezläsäk tä, bar şundıy şäxeslär, alarnı berniçek tä tarixtan alıp taşlap bulmıy. Menä şundıy böke zatlarnıñ berse, hiçşiksez G.İbrahimov. Yazuçı mirasın yaxşı belep, döres añlar öçen, äsärlären sovet zamanındağı kebek qısqartmıyça, mömkin qadar tulı, tögäl itep yañadan bastırırğa kiräk.

G.İbrahimov barça törki xalıqlar ädäbiätına, bilgeräk tä başqort xalıq ädäbiäte üseşenä zur öleş kertkän şäxes. Başqortstan yazuçıları berlege räise Räwil Bikbaev: başqa tatar klassik yazuçıların tuğan yaqlarında, mäsälän, H.Taqtaşnı Tambov ölkäsendä niçek qäderlilärder ansın belmim, läkin bez G.İbrahimov isemen mäñgeläşterügä küp köç salabız, dide. Häm aldağı süzlärne äytte:

Bügenge köndä başqort cire üzeneñ böke yaqtaşına olı xörmät saqlıy. Başqortstanda bar tatar awıllarında tatar tele uqıtılıp, “Ömet”, “Qızıl tañ” gäcitläreneñ, “Tulpar” jurnalınıñ tatar dönyasında zur tirajlar belän çığuı da şul xaqta söyli.

Çığışlar tämamlanğaç, kiçäneñ ikençe öleşendä G.Qamal teatrı artistları ezärlägän spektakl' kürsätelde.

Mäğrifätçe, şağir Aqmullanıñ 100 yıllıq yubileenda başlanğan traditsiä, G.İbrahimov tormış häm icat yulına yaqtırtqan “Tirän tamırlar”spektakl'ye belän däwam itterelde. P'yesa avtorı Yunıs Safiullin häm G.Kariev isemendäge Yäşlär teatrınıñ baş rejisserı Rinat Äyupov tarafınnan quyılğan spetaklne tamaşaçılar zur qızıqsınu belän qaradı. Tamaşada G.İbrahimovnıñ Yaladağı tormışı, ädip yanına ber törkem yazuçılar K. Näcmi, F. Burnaş, K.Tinçurinnar kilü belän başlanıp kitä. Xatını Gösemneñ xıyänäte, repressiälär qorbanı bulıp, awır yazvalarğa tarttırıluı ayanıçlı kartinalar belän sürälänä. Spektakl'dä G.İbrahimovnıñ Stalin, Lenin kebek yulbaşçılar belän eşçänlege urın alğan. Stalin rolen Rinat Tacetdinov, Lenin rolen İldus Äxmätcanov osta, tormışçan itep uynadılar. Şulay uq G.İbrahimov Pälätän törmäsendä çaqta G.İsxaqinı küz aldına kiterä, häm alarnıñ säyäsi bäxäsläre, donğa bulğan qaraşları surätlänä. Zur tırışlıq salıp uzdırılğan çara köçle alqışlar belän tämamlandı. Mondıy kiçälär kürenekle ädiplärebezneñ icat häm tormış yulın yaxşıraq istä qaldırırğa yärdäm itä, mäñgeläşterä.

XS
SM
MD
LG