Accessibility links

якшәмбе, 11 декабрь 2016, Казан вакыты 11:05

Qazanda “Min tatarça söyläşäm” aksiäse uzdı


“Min tatarça söyläşäm” aksiäse äle ikençe tapqır ğına oyıştırıluına karamastan şaqtıy yañğıraş aldı. Anı “Üzebez” yaña buın xäräkäte häm Bötendönya tatar yäşläre Forumı byurosı oyıştıra. Ul kübräk yäşlärne cälep itärgä dip oyıştırılsa da, uzğan yıl da, bıyıl da ölkän buın wäkilläre dä şaqtıy kürengäläde. Mäsälän, yazuçı Fäwziä Bäyrämova:

Menä bügen mäydanğa cıyılğan yäşlär bez Azatlıq yaulap yörgändä 3-4 yäşlek balalar ide häm bezneñ belän buldılar. Xäzer alar inde üzläre ana telne saqlarlıq keşelär bulıp üstelär. Kübräk yäşlärne tartırğa kiräk. Monda bit tatarça söyläşergä genä öyrätmibez, ä milli mädäniät, qaharmannarıbız belän dä tanıştırabız. Bu ber kön genä tügel, ä yıl däwamı şulay barırğa tieş.

Fäwziä Bäyrämova älege çaranı kübräk millät üseşe belän bäyläsä, yäşlär küñel açu kebek qaradı.

Çarada mäktäp uquçıları da, studentlar da teläp qatnaştılar. Monda cır-biyudän tış, tatar telenä qağılışlı bäygelär uzdı. Rusçadan tatar telenä iñ uñışlı tärcemä itüçelärne büläklär kötä ide.

“Min tatarça söyläşäm” aksiäsendä mondıy yarışlar küp buldı. Şulay uq älege çara Tatarstan rayonnarındağı mäktäplärdä dä oyıştırğan bulğan. Anda qatnaşıp ciñüçelärgä şulay uq bügen büläklär tapşırıldı. Äytergä kiräk, ägär uzğan yıl bu bäygene yäşlär üz köçläre belän genä oyıştırsa, bıyıl inde Qazan xakimiäte aqçalata yärdäm itkän. Märkäzebezneñ tellär üseşe bülege citäkçese İrek Arslanov:

Yäşlär öçen ğorurlanıp torabız. Bu G. Tuqay könendä genä ütärgä tieş tügel, bezneñ yazuçılarıbız, ğalimnärebez küp häm alarğa bağışlap ta yäşlär uram tutırıp mondıy çaralar ütkärergä tieş.

“Min tatarça söyläşäm” aksiäse 3 säğät däwam itte. Bäygelär arasında al'ternativ tatar cırı başqaruçı yäşlär çığış yasadı.

Landış Xarrasova

XS
SM
MD
LG