Accessibility links

җомга, 9 декабрь 2016, Казан вакыты 16:36

Estoniädäge tärtipsezleklär: ber keşe ülgän, distälägäne yaralanğan, yözlägäne totqarlanğan


Tallinnda sovet soldatı häykäleneñ sütelüe tiräsendä kierenkelek däwam itä. Politsiä mäğlümatenä qarağanda, uzğan töndä bulğan çualışlarda 100gä yaqın keşe yaralanğan, şul isäptän, politsiä wäkilläre dä. 600läp keşe totqarlanğan, alarnıñ kübese - iserek xäldäge rus yäşüsmerläre, dielä. Häykälneñ sütelüenä protest belderep alar şiğärlär qıçqırğan, politsiägä taşlar, şeşälär atqan, kibet täräzlären wata başlağan. Politsiä alarğa qarşı küz yäşe çığara torğan gaz, su-atıqçlar qullanğan.

Atnakiç çualışlarında pıçaq cäräxäte alıp xastaxanädä wafat bulğan keşeneñ Estoniädä yäşäwçe Rusiä watandaşı 20 yäşlek Dmitriy Ganin bulğanı açıqlandı. Eston räsmiläre, politsiäneñ moña ber qatışı da yuq dip belderä.

Tallinndağı sovet soldatı häykälen estonnarnıñ kübese sovet okkupatsiäse bilgese dip sanıy. Rusiä – bu häykälne sütü – faşizmğa qarşı suğışta qorban bulğannarnıñ xäteren mäsxärä itü di.

Comğa könne Rusiä tışqı eşlär ministrı Sergey Lavrov, Estonaiägä qarşı citdi çaralar küreläçäk dip kisätte.

Estoniäneñ saqlanu ministrlığı süçese Madis Mikko häykelne urınınnan alu qararın bolay añlattı:

"Estoniä İkençe dönya suğışı tarixın kiredän yazırğa cıyınmıy. Estoniä berqayçan da, bu häykäl cimereläçäk, dip äytmäde. Mäsälä şunda – zamanında propaganda maqsatı belän anda quyılğan qäberlär – ziratta tınıç urın alırğa tieş" dide Estoniä wäkile.

Çualışlar, Tallinnan qala, urıslar küp yäşägän Johvi, Kohtla-Jarve şähärlärendä dä bulğan. Şimbä könne Rusiä prezidentı Vladimir Putin, Germaniä kanslerı Angela Merkel belän telefon aşa söyläşüendä, Estoniädäge xällärgä "citdi borçılu" belderde.

Comğa könne BMOnıñ general sekretare Ban Ki-moon, taraflarnı çıdamlıq kürsätergä, mäsäläne ber-bereñä ixtiram nigezendä xäl itergä çaqırdı.

Ali Ğilmi
XS
SM
MD
LG