Accessibility links

дүшәмбе, 5 декабрь 2016, Казан вакыты 05:40

Soros: "Minem öleşem artıq küpertelä"


Amerikan milliarderı George Soros belän tanıştırunıñ kiräge yuqtır. Üzeneñ Açıq Cämğiät İnstitutı häm Soros waqıfı aşa ul xäyriä eşlärenä yözlägän millionlağan dollar sarıf itkän keşe. Könçığış Yewropa, elekke sovet illärendä, şul isäptän, Tatarstan, Başqortstanda da. Uzğan atna ul radiobıznıñ Pragadağı baş fatirında bulıp, äñğämä birde.

George Soros soñğı yıllarda Ukraina, Qırğızstan, häm bigräk tä Gruziädä bulğan inqilablarğa öleş kertkän keşe sanala. Başlap bez annan şuşı "öleşe" turında soradıq.

Soros: Minem ul öleşem artıq küpertelä. Bigräk tä prezident Putin, häm başqalar, Şevarnadze tarafınnan. Alar inqilabnı oyıştıruda mine ğäyepli, çınbarlıqta rejimnı xalıq bärep töşergänen tanırğa telämi.

Azatlıq: Kire artqa borılıp qarasaq, sez Gruziädä bulğan xällär belän qanäğätme?

Soros: Gruziä, däwlät bularaq, çınlap ta üzgärde. Korrupsiä küpkä kimede. Gruziä xäzer Rusiäneñ basımına qarşı tora ala. Ä basım köçle, çönki Putin Gruziäneñ bäysez buluın kürergä telämi. Ber waqıt alar gaznı, elektrnı kiste, ämmä Gruziä yäşäp qaldı. Qızğanıçqa qarşı kierenkelek bar, gärçä, yaxşı mönäsäbätlär Gruziägä dä, Rusiägä dä faydağa bulır ide. Minemçä, xäzer Gruziä üzen uñışlı rejim itep kürsätä.

Azatlıq: Bu uñay bäyälämä Ukrainağa da turı kiläme?

Soros: Ukraina belän qatlawlıraq, çönki, Rusiä gaznı kontrolgä ala aldı. Rusiä Ukrainanı, Gruziägä qarağanda nığraq tota. Şuña da qaramastan, Ukraina canlı, demokratik cämğiät bulıp qala. Cämğiät türälärneñ qayber qılanışın qabul itmiäçägen kürsätte. Xökümättä kem genä bulmasın, monı iskä alırğa tieş bulaçaq.

Azatlıq: İnde Rusiägä kilsäk, andağı cämğiät ni xäldä? Rusiälelärneñ, ireklekne bik önämägän, köçle citäkçe bulğan prezident Putinnı yaratuı, sezne borçıymı?

Soros: Min Rusiägä çınalp ta, küp aqça häm köç saldım. Ul 5-10 yıllıq zur proyekt ide. Şuña kürä, älbättä, küñel qayttı. Läkin üz prinsipları öçen torırğa äzer keşelär anda härçaq az ide. Sovet çorında ul dissidentlar buldı. Xäzer şul çaqlar kire qayttı kebek. Alay da, Peterburda qarşılıq çarasına 2 meñläp keşe çıqtı. Militsiä küpkä kübräk buluğa qaramastan. Yağni, andıy keşelär bar. Häm, minemçä, küplär, alarğa çittän torıp teläktäşlek belderä.

Azatlıq: Sez AQŞ prezidentı George Buşqa da kisken tänqit belderäsez. Soñğı saylawlarda aña qarşı kampaniägä millionlağan dollar sarıf ittegez. Sezneñçä, Aq Yortnıñ tışqı säyäsäte äle dä tiskäreme?

Soros: Minemçä, Buş administartsiäseneñ säyäsäte Amerikanıñ dönyağa täesir itü säläten bermä-ber kimette. Amerikanıñ üz prinslplarına xıyänät itüe dä, dönyağa zyıan kiterde. Buş administrasiäse berniçä ölkädä açıq cämğiätneñ töp prinsipların bozdı: keşe xoquqlarında, totqınnar belän eş itüdä, säyäsi bulmağan mäsälälärne säyäsiläşterüdä. Min bolar turında kisätep kildem. Şöker, amerikan cämğiäte xäzer Buş säyäsäten kire qağa başladı.

Ali Ğilmi
XS
SM
MD
LG