Accessibility links

пәнҗешәмбе, 8 декабрь 2016, Казан вакыты 11:09

İñ zur mitingnı “Berdäm Rusiä”lelär oyıştırdı


Yaz häm xezmät köne bularaq bilgele 1 may bäyräme, yänä säyäsi firqälär arasındağı köräştä, kemneñ kem ikänen kürsätergä mömkinlek birde. Keşe sanınnan qarağanda, berençelekne Berdäm Rusiä yalladı. Sişämbe, älege firka citäkçelärenä iärep, üzäk uramnarda, 5 meñgä yaqın keşe yörde. Miting barışında, bez Berdäm Rusiäneñ säyäsi şura särkätibe urınbasarı, däwlät şurası deputatı Rimma Ratnikovadan älege firqäneñ maqsatları turında soradıq. Bügenge bu mitingnı profsoyuzlar oyıştırdı. Berdäm Rossiä partiäse isemennän bez alarğa quşıldıq. Alar kütärgän sorawlarnıñ kübese iğtibarğa layıq, bez bu rezolyutsiälärne bergä äzerlädek. Sotsial' blokta bik küp açılmağan sorawlar bar. Rezolyutsiädä pensiä turında, byudjet ölkäsendä eşläwçelärneñ xezmät xaqı turında, h.b. şundıy mäs'älälär kütäräbez. Mondıy mitinglar bügen küp kenä illärdä uzdırıla. Minemçä federal' üzäk tä, ilneñ citäkçelege dä moña qolaq salırğa tieş. Mitingqa “Ğädel Rusiä” firqäse dä çıqqan ide. İskä töşerik, berniçä ay elek, Tatarstan belän Rusiä arasında şartnamä qabul itelergä torğanda, älege firka başlığı Sergey Mironov, berençelärdän bulıp, moña qarşı çıqtı. Şul waqıtta Prezident Mintimer Şäymiev, saylawlar waqıtında Ğädel Rusiägä Tatarstanda bik qıyın bulaçaq dip faraz qılğan ide. Şunlıqtan Respublikada bu firqağä qarata tiskäre qaraş urnaştı, diärgä bula. Mondıy mönäsäbätne belä torıp, 1 mayda Bayraqlar kütärep çığuı niçek kenä qıyın bulmasın, Ğädel Rusiälelär barıber dä mitingqa çıqtı. Rusiä külämendä möhimlege buyınça ikençe urında torğan, Ğädel Rusiä, kilgän keşelär sanına qarağanda bügen mesken xäldä ide. Şunısı da qızıq, Ğädel Rusiälelär älege mitinglarda kommunistlarnı xäterlätte. Härxäldä qullarındağı bayraqlar ikeseneke dä ber qızıl töstä ide. Ğädel Rusiäneñ mitingqa çığuınıñ maqsatı turında, bu firqäneñ töbäk bülege citäkçese urınbasarı Rinat Xäbibulaevtan soraştıq Berençe çiratta bez watandaşlarıbıznı bäyräm belän qotlarğa telädek. Miting barışında bez Ğädel Rusiä firqäse citäkçese Sergey Mironov sälämläw xatın uqıdıq. Bezneñ firqäneñ töp fikere şunda – sotsial' säyäsätkä üzgärtü tügel, ä anı asılda yañaçadan tözü. Yaña säyäsättä liberal' iqtisat, häm sotsialistik qimmätlärne torğızu küzdä totıla. Mitingta qaysı firqäne küpme keşe xup kürüe näticäsendä, saylaw aldınnan, säyäsi firqälärneñ däräcäläre dä bilgele bula. Bügenge köndä irkälär arasındağı köndäşlekne Berdäm Rusiäneñ säyäsi şura särkätibe urınbasarı Rimma Ratnikova bolay bäyäli. Östenlek küpkä, çönki bik küp xalıq bezgä quşıldı. Yäşlär dä bezneñ fikerlärne urtaqlaşalar. Läkin bez säyäsi üzäktä barabız. Bezdän sul yaqta, kommunistlar belän “Ğädel Rusiä”lelär, uñ yaqta “SPS”, “Yabloqo” tora, läkin alar bügen çıqmadılar häm çıqmayaçaqlar, çönki alarnıñ ideyäläre başqa, alar bay keşelärneñ partiäläre. Mitinglarğa cıyılğan xalıqqa qarap, şundıy näticä çığarırğa bula - küpçelek Qazanlılar, “Berdäm rusiäne” xup kürä. Ni öçen? Älege firqäneñ östenlege nidä? Berdäm Rusiä köndäşläre fikerençä bu älege firka citäkçelege asılda däwlät räsmilärdän toruı belän bäyle. Ğädel Galämetdinov.

XS
SM
MD
LG