Accessibility links

Кайнар хәбәр

Samarda qarşılıq çarasında 80-90% yäşlär ide


Samar şähäreneñ üzäk mäydanı bulıp Kuybıyşev mäydanı sanala. Näq menä şul mäydanda zamanında Nikita Xruşçevnıñ östenä yomırqalar tondırdılar, näq şul mäydanda Samar qalasınıñ säyäsi qazanı qaynala. Bıyılğı may bäyräme suıq cillär belän genä istä qalmadı. Qarşılıq mitingısınıñ eçtälege – xäyerçelekkä qarşı köräş simvolı bulıp qabul itelde. Menbärgä kem genä kütärelsä dä, qänäğätsezlek turında süz bardı. Pensiä yäşendägelär açlı- tuqlı yäşilär, xäyerçelekkä tüzä almıyça alarnıñ kübese eşli, bu üz çiratında yäşlärne eşsez qaldıra. Äbi- babaylarnıñ eşläwe cämğiättä ikençe zur kimçelekkä kiterä. Olılarnıñ üzläreneñ onıqların tärbiälärgä waqıtları qalmıy, äbi- babay qulı timägän balalar bozıqlıq yulına tizräk basalar. Samarda bügenge köndä balalar baqçaları tözelmi, atlağan sayın çirkäwlär häm zur säwdä üzäkläre qalqıp tora. Ber säğät barğan mitingta qızıl sızıq bulıp xalıqnıñ matdi xäle häm bügenge xökümät belän qänäğätsezlek xise yañartıldı:

Bügenge köndä iñ naçar yäşägän qatlam – ul xezmät xalqı! Ay yarım elek saylawlar waqıtında “Berdäm Rossiä” firqäse pensionerlarğa 10000 sum pensiä, eşçelärgä 25000 sum eş xaqı wäğdä itkän ide. Wäğdäläregezne tormışqa aşırırğa waqıt!

Bügen xezmät xalqı partiälärgä bülengän häm berläşüne tik profsoyuzlar ğına tä'min itä ala!

Niçek inde tınıç qına eşli alasıñ, ägärdä bügenge köngä dä ışanıç yuq ikän. İrtägese kön turında uylarğa da yuq inde!

Bıyılğı miting bıltırğısınnan tamırdan ayırılıp tordı. Ägär dä uzğan yılnı näfrät mitingısına tik kommunistlar ğına kilgän bulsa, bıyıl näfrät cıyınına kommunistlardan tış “Berdäm Rossiä” häm “Ğadel Rossiä” firqäläre kilgän idelär. Şunısı küzgä bik tä taşlandı. Kommunistlar küp ide, “Berdäm Rossiä” bayraqların kütärgännär 15- 20 yeget- qız bulsa, “Ğadel Rossiä” tarafdarları zur kolonna bulıp mäydanğa kilep kerdelär, häm alar mitingtağılarnıñ küpçelege bulıp çıqtı.

Mäydandağı xalıq “Berdäm Rossiä” firqäse citäkçese, guberna Duma räise Viktor Sazonovqa söylärgä irek birmäde. Federal' xökümätkä dä eläkte:

Bezgä mondıy xökümät kiräkmi, mondıy xökümätne tizäkle seberke belän quarğa kiräk!

Bıyılğı miting şunı kürsätte. Ägärdä Samarda qänäğätsezleklär isemlegen elek tik kommunistlar ğına citäkläsä, bıyıl bu ağımğa “Ğadel Rossiä” firqäse görläp kilep kerde. Ägär dä elek Samarda qarşılıq mitinglarında 90% olılar bulsa, bıyıl 80-90 % yäşlär täşkil itte. Şunısı da küzgä taşlana, mikrofonğa söyläwçelär hiç tä xäyerçelek belän genä çiklänmädelär, barçası da Rossiä däwlätendäge türälärneñ eşe belän qänäğätsezlek belderdelär, töp ğayıpne Mäskäwdän kürdelär.

XS
SM
MD
LG