Accessibility links

дүшәмбе, 5 декабрь 2016, Казан вакыты 07:42

Bush Ğiraqtan ğäskärlärne çığaru qanunına veto saldı


AQŞ prezidentı George Bush bıyıl Ğiraqtan amerikan ğäskärlären çığarunı taläp itüçe qanunğa veto saldı. Bu qanunda Ğiraq belän Äfğän suğışlarına 100 milliard dollar birü qararı da bar ide. Veto saluı belän Bush demokratlarnıñ xalıqta yaqlaw tapmağan Ğıyraq suğışında AQŞnıñ strategiäsen üzgärtü täqdimen kire qaqtı.

Demokratlar täqdim itkän häm Kongressta barı 4 respublikannıñ ğına yaqlawın tapqan bu qanunda yül ayınnan başlap häm sintäberdän dä soñğa qalmıyça Ğiraqtağı AQŞ ğäskärlären çığara başlaw turında yazılğan. Şulay uq barlıq ğäskärlärne kiläse yılnıñ mart axırına çığarıp beterergä digän mäcbüri bulmağan maqsat ta quyıla.

Ämma demokratlarnıñ bu täqdime Bush vetosı belän yuq itelä. Oppozitsiädäge Demokratlar Kongressta Bushnıñ qarşılığın ütü öçen zarur bulğan öçtän ike küpçelekkä iä tügel.

Şulay itep bügen ike partiä kompromiss çişeleş turında söyläşülär başlıy. Çişeleş ezläwdä Bush belän oçraşular da qarala.

Bu Bushnıñ üz xakimiäte çorında 2-nçe märtäbä genä veto qullanuı buldı. Sişämbe könne ul televidenie aşa il xalqına möräcäğät itep üz qararına mondıy añlatma birde.

"Doşmanğa ğäskärlärne çığarunıñ qayçan başlanuın äytergä yaramıy. Terrorçılar üz kalendarlarında ul könne bilgeläp, köç cıyıp Ğiraqtağı xökümätne niçek bärep töşerü häm ilne üz qullarına alu turında uylana başlıyaçaq. Minemçä, çığaru waqıtın bilgeläw Ğiraq xalqınıñ ruxın töşeräçäk, kiñräk Yaqın Könçığışta üterüçelärne ruxlandıraçaq häm Amerikanıñ üz yöklämälären ütämiäçäge turında işarä bulaçaq" dide Bush.

Fiker beleşülär küpçelek amerikannarnıñ Ğiraqtan ğäskärlärne niçek tä bulsa çığaru yaqlı buluın kürsätä. Şul fiker beleşülär näticälären istä totıp Wäkillär Pulatı räise, demokrat Nency Pelosi Bush qararına demokratlarnıñ qänäğätsezlegen belderde.

"Min Amerika xalqınıñ zur küpçelege yaqlağan ike partiä tarafınnan xuplanğan qanunğa prezident xörmät belän qarar dip ömetlängän idem. Anıñ urınına prezident qanunğa kisken räweştä veto saldı häm qanunnı açıqtan-açıq bozıp kürsätte" dide Pelosi.

Ike yaq ta bu qanunğa bäyle eşçänleklären simvollar belän bizäde.

Bush vetonı Ğıyraqta üterelgän xäbineñ atası büläk itkän qäläm belän imzaladı.

Kongresstağı demokrat citäkçelär isä qanunnı Bushqa täqdim itü öçen Busnıñ Ğiraqta ciñü iğlan itüenä 4 yıl tulğan könne kötep tordı.

Xäzer Kongresstağı ike partiä dä aldağı könnärdä yäki atnalarda qıyın kompromissqa ireşü zarurlığı buluın tanıy. Demokratlar Wäkillär Pulatında da Senatta da küpçelekne täşkil itä. Şuña kürä alar Bush imzalarlıq qanun äzerlärgä tieş bulaçaq. Yuğisä alarnı suğış çorında ğäskärlärne finanslamawda ğäyepliäçäklär.

Küp kenä demokratlar suğışqa aqça bülü turındağı yaña qanunğa Ğiraqta tärräqiätne bilgeläp baru şartın da kertergä kiräk di. Ägär tärräqiätkä ireşelmäsä AQŞ ğäskärläre Ğıyraqtan kitärgä yä mäzhäbara bäreleşlär barğan şähär cirlärennän çitkäräk küçerelergä tieş bulaçaq. Senattağı respublikannar citäkçese Mitch McConnell sişämbe könne xäbärçelärgä respublikannar tärräqiätne bilgeläp baru taläbe belän kileşäçäk dide. Ämma ul bilgelärlek tärräqiät bulmağan oçraq öçen mäcbüri şartlar quyuğa riza bulaçaqmı yuqmı ikänen äytüdän baş tarttı.
XS
SM
MD
LG