Accessibility links

якшәмбе, 11 декабрь 2016, Казан вакыты 09:12

Azatlıq/Azat Yewropa radiosı matbuğat ireklege öçen köräşneñ alğı safında


Ezärlekläw, yanawlar, xättä ülem oçraqları. Dönyanıñ küp kenä urınnarında jurnalistlar üz eşen şuşı qurqınıçlar astında başqarırğa mäcbür. Azatlıq/Azat Yewropa xäbärçeläre dä çığarma tügel. Soñğı 12 ay eçendä radiobız 2 xezmätkären yuğalttı. Cäräxätlänüçelär, qulğa alınuçılar, räsmilär tarafınnan ezärleklänüçelär bar. Bügen, matbuğat ireklege könendä, bez alarnı iskä alabız.

Ğiraq jurnalistlar öçen dönyada iñ qurqınıç urın bulıp qala. Soñğı ber yılda ğına anda 40-tan artıq jurnalist hälak buldı. Uzğan ayda şuşı isemlekkä radiobıznıñ xäbärçese Xamail Xäläf tä östälde. Bağdadta anıñ üle ğäwdäse tabıldı.

"Xezmättäşeñ urlanğan häm bälki cazalanıp üterelgän digän xäbärne işetü bik awır. Bigräk tä, anı belgän, äle genä söyläşkän keşelär öçen. Berençe kiçereşlär bik awır. Älbättä Ğiraqta härkemneñ köndälek räweştä şundıy qurqınıç astında yäşäwen dä iskä alırğa kiräk. Kübeseneñ monnan qotılu çarası yuq" di Azat Ğıyraq radiosı mödire Sergey Daniloçkin.

Radiobıznıñ Äfğanstandağı xäbärçeläre dä kön sayın ülem östennän atlap yöri, diärgä bula.

"Berniçä ay elek Xosttağı xäbärçebez Ämir Bahir intihar höcümdä häläq bulğan gubernator cenazasın yaqtırtırğa bardı. Näq şul cenaza waqıtında tağın ber intihar höcüm bulğan. Bezneñ xäbärçebez dä cäräxätlär aldı. Bäxetkä qarşı awır cäräxätlär tügel" di Azat Äfğanstan radiosı mödire Äqbär Ayazi.

Äqbär äfände äytüençä, xäbärçelär Taliban ğına tügel, ä qır komandirları, narkotik satuçılar, xättä, xökümät räsmiläreneñ basımına duçar.

Uzğan yıl ğömere özelgän jurnalistlar arasında radiobıznıñ Törkmän bülege xäbärçese Ogulsapar Muradova da bar.

"Ul bezgä 2006nıñ martınnan birle xäbär birep kilde. Anıñ xäbärläre nigezdä Törkmanstannıñ sotsial mäsäläläre turında ide. Yün ayında anı törmägä utırttılar, sintäberdä ul törmädä wafat buldı. Tuğannarı anıñ ğäwdäsendä cäzalaw ezläre kürgän, täfsille tikşerü taläp itkän. Läkin ul tikşerüne kötep ala almadı. Törkmän räsmiläreneñ bu ülem xaqında älegäçä räsmi xisabı yuq" di radiobıznıñ Törkmän bülege mödire Cähän Däwlätova.

Cähän xanım süzlärençä, Törkmanbaşı wafatınnan soñ ildä ireklek artır digän ömetlär bulğan, läkin bu ömetlär tormışqa aşmağan. Jurnalistlar xaman da räsmilärneñ qatı küzätüe astında. Könçığış Törlmanstandağı ike xäbärçedän inde 3 atna buyı ber xäbär dä yuq.

İran räsmiläre menä inde berniçä ay Farda radiosı xäbärçese Pärnäz Azimanı ildän çığarmıy. Awır xäldä yatqan änisen kürergä qaytqan Pärnäz xanımnıñ räsmilär hawa alanında pasportın tartıp alğan.

Çärşämbedä Fransiäneñ Bayö şähärendä üterelgän jurnalistlar istälegenä memorial açıldı. Anı Çiklärne tanımağan jurnalistlar oyışması qorğan. Yul buylap salınğan 23 aq taşqa 1944 yıldan birle eş östendä üterelgän 1800dän artıq jurnalistnıñ isemnäre yazılğan. Alar arasında radiobıznıñ törkmän bülege xäbärçese Ogulsapar Niyazova iseme dä bar.

Ali Ğilmi
XS
SM
MD
LG