Accessibility links

шимбә, 3 декабрь 2016, Казан вакыты 18:36

Bulaçaq artistlar säxnädä ozaq uynarmı?


Bıyılğı dürtençelär Qazan teatr uçilişçesınıñ säxnä tele uqıtuçısı Täslimä Fäyzullinanıñ ikençe çığarılışı. Uqırğa kergändä alar 17 yeget häm qız bulğan bügengä isä 12 keşe qalğan.

Yıldan- yıl ratsionalistlar kübebräk kilä. Bu kurs kübebräk aqça yarata. Bezneñ käsep, professiägä bik az aqça tülilär bit. Bolarğa ul oşap citmi. Ä moña qädär bulğan kurs ul turıda uylamadı da dip äytsäk tä bula.

di Täslimä Fäyzullina. Uqunı tämamlağançı uq bulaçaq artistlar buldıra alğan eşlärennän aqça tabu yulına basqannar inde.

Öçençe kurstan birle bez rayonnarda, awıllarda konsertlar quyıp yöribez. Spektakl'lär belän, konsert belän yöribez.

di Al'bina Töxwätullina. Aldan söyläşep ximayäçelär dä tabalar, üzläre 30 sumnan bilet ta satalar ikän. Äle yaña ğına Tübän Qama drama teatrı çaqıruı belän bu gruppa anda barıp, ike spektakl' häm konsert kürsätep, härqaysı 500 är sum aqça da eşläp qaytqan. Teatr mödire, rejisser bik cılı qabul itkän alarnı. Avtobusnı da teatr birgän, qunaq ta itkännär. Tübän Qama teatrı bu törkemne tulısı belän üzenä eşkä alırğa teli. Bulaçaq artistlarğa tulay toraqta urın da, ayına yaqınça 5 meñ sum xezmät xaqı da wäğdä itkännär. Ä xıyallarına kilgändä isä,

Küñellärendä xıyalları- barısınıñ da Qazanda qalasıları kilä inde. Teatrdan bigräk alar şähärgä iäläşä. Qazan Qazan bit inde beläsez. Qazanda qalu mömkinçelege konkret qına bügen yuq.

di uqıtuçıları Täslimä Fäyzullina.

Bezneñ barıbız da Kamal teatrında eşlärgä xıyallanadır dip uylıym min.

dip uqıtuçılarınıñ süzen Qazan qızı Güzäl Şämärdanova da qüätli. Monsı xıyal. Ä çınlıqta isä, Güzäl uçilişçeğa diktor bulam dip kergän, uqi-uqi säxnädä uynaw da küñelenä xuş kilä başlağan. Betergäç, Tübän Qamağa baraçaqmın dip özderep äytte ul. Ä menä Saba yaqlarınnan Miläwşä Miñlehadieva isä,

Min teatrda eşlämäyäçäkmen!

di. Teatr uçilişçesınıñ bıyılğı çığarılış kurs citäkçese artist İldar Xäyrullin teatrğa barıp eşlärgä telämäwläreneñ säbäben ällä qayan ezlärgä dä kiräkmi, di. Eş xaqı bötenläy tübänneñ tübäne. Yäş belgeçkä 3 meñ. Kilälär alar. Obşçejitie xäzer yuq. Aqçası yuq. Barğan oçraqta da, ber yıldan soñ bu xälgä tüzep bulmıy. Kitälär.

Tatarstannıñ Xalıq, Rusiäneñ atqazanğan artistı İldar Xäyrullin üze Qamal teatrında ayına urtaça 4300 sum aqça ala.

İldar Xäyrullin citäkçelegendäge, ber törkem monnan 4 yıl elek Teatr uçilişçesın betergän bulğan inde. Alarnıñ barsın da Qazan tatar däwlät yäş tamaşaçılar teatrı alğan bulğan. Barsı da säxnädäme alar, teatr sänğätenä xezmättäme?

Kem belä inde keşe kollektivındağı neçkäleklärne. Bügenge köndä anda Marsel' Mäxmütov eşli häm ştatta tora dip beläm Al'bina isemle şäkertebezne. Qalğannarı, ni ğäcäp, ämma dä läkin alar teatrda tügel. Şunsı quanıçlı Röstäm Gäyzullin digän akternı Tinçurin teatrınıñ baş rejisserı Räşit Zahidullin üzenä aldı. Kübese eşlämi. Bezneñ uqıtuçı eşeneñ iñ ükeneçle mizgele menä şul.

di Täslimä Fäyzullina. Ä isäpläp qarasañ küpme däwlät aqçası tikkä israf itelgän bulıp çığa tügelme soñ? Uçilişçe mödire Ğilemxan Möbäräkşin äytüençä, studentnı ber yıl uqıtu urtaça 55 meñ sumğa töşä. Bügenge köndä Tatarstanda klaster yünäleşendä uqıtu turında küp söylänä. Ğadi genä itep äytkän waqıtta, üzlärenä belgeç kiräk bulğan şirkätlär, sänäğät oyışmaları uqu yortı belän kileşü tözep belgeçlär äzerlätä. Xädäfle uqıtu waqıtında belem birügä totılğan däwlät aqçası israf bulmıy. Stipendiä dä kübebräk bulırğa mömkin. Belgeç tä aldan tözelgän kileşügä kürä, kiläçäktäge 5-10 yılda qayda eşläyäçägen belep tora.

Nail Alan

XS
SM
MD
LG