Başqortstannıñ Blagoveşçen şähärendä 2004 yılda şuşı şähärdä militsiä häm OMON köçläre tarafınnan qılınğan çistartularğa bäyle mäxkämä utırışları yañadan başlanıp kitte. 3 mayda Blagoveşçen şähäre eçke eşläre bülege citäkçelärenä qarata açılğan mäxkämä eşen qaraw yañartıldı. Anda ğäyeplänüçe öç militsiä xezmätkäre häm alarnı yaqlawçı advokatlar, şulay uq qaza kürgän 7 keşe qatnaştı.
Utırış Blagoveşçen şähäre eçke eşlär bülegeneñ elekke başlığı İldar Ramazanovnıñ qayber däğwäların tikşerüdän başlandı. Ul, üz eşen tikşerüdä xoquq bozular bar digän sıltaw belän, barlıq tikşerü käğäzlären prokuraturağa kire qaytarunı taläp itä. Bu däğwä buyınça qararnı mäxkämä 7 may könne ütäçäk utırışta iğlan itäçäk, dip äytelde. Şunnan soñ İldar Ramazanov üzeneñ tağın ber möräcäğäten tapşırdı. Anda ul Başqortstan prokuraturasınıñ üz eşen tikşerüçe barlıq xezmätkärlären almaştırunı taläp itä. Monı ul respublika prokurorı Sergey Xurtin belän şäxsi mönäsäbätläre bozılu belän bäyläp añlata. Alay ğına da tügel, üzenä qarata ğädelsezlek qılına dip, Sergey Xurtinnı cawapqa tarttıru turında sorap, Rusiä General' prokuraturasına şiqayät belän möräcäğät itüe xaqında da belderde Ramazanov. Mäğlüm buluınça, Sergey Xurtin moña qädär militsiä xezmätkärlärenä qarata çığarılğan qayber yomşaq qararlarnı ğamlädän çığarunı sorap, Rusiä Yuğarı mäxkämäsenä möräcäğät itkän ide. Menä şuşı xäl Blagoveşçen Eçke eşlär bülege başlığına oşamağan.
Blagoveşçenda mäxkämä utırışı comğa könne dä däwam itte. Bu yulı ğadi militsiä xezmätkärläre eşläre tikşerelde. Aldağı mäxkämä utırışı yal könnärennän soñ, 7 mayğa bilgelände. Şulay itep bar ilgä yamanatı taralğan “Blagoveşçen eşe” ike yıldan artıq inde däwam itä häm törleçä totqarlawlar, yañadan-yaña däğwälar kilep çığu säbäple, äle anıñ azağı da kürenmi, şikelle.
