Accessibility links

якшәмбе, 4 декабрь 2016, Казан вакыты 17:28

Başqortstanda da Estoniädän üç alalar


Rusiädä Estoniägä qarşı başlanğan höcümnär şawqımı Başqortstanğa da kilep citte. “Universal-treyding” säwdä çeltäreneñ Başqortstandağı kibetläre üzlärendä Estoniädä citeşterelgän azıq-tölekne häm başqa kiräk-yaraqlarnı satudan tuqtawları xaqında belderde. Älege säwdä çeltäre üzendä Başqortstanda häm Mäskäwdä urnaşqan “Matritsa” isemle 31 kibetne berläşterä. Alarğa respublikadağı tanılğan tatar ğalime Xämit Ğizzätullinnıñ ulı Timur citäkçelek itä.

Älege qarar turında fikeren tulıraq belü öçen, bez Timur äfändeneñ üzenä möräcäğät itärgä uylağan idek. Ämma anıñ Ufada bulmawı turında äyttelär. “Universal-treyding” aksionerlar cämğiäteneñ matbuğat süzçese Zarema Mirsäyapova äytüençä, Estoniädän kertelüçe mallarnı satunı tuqtatu qararı östän quşu belän eşlängän eş tügel. “Monı säwdä çeltäre citäkçelege üze şulay qarar ite, - di ul. – Häm bu tıyu küpme kiräk şulqädär waqıt däwam itäçäk. Bez Estoniädän moña qädär alınğan tawarlarnı häm azıq-tölekne başqa töbäklär häm illär rizıqları belän almaştırabız. Şuña da bu ğämäldän satıp aluçılar zıyan kürmäyäçäk”.



Şulay itep bar Rusiädä Estoniägä qarata tiskäre qaraş başlanu Başqortstannıñ da çitlätep ütmäde. Üzlären çın patriotlar dip isäpläwçelär biredä dä bu şawqımğa därräw quşıla. Kemnärder bu ğämälläre belän başqalar arasında ayırılıp toru, reklama yasaw öçen dä qulay ısul kürä şikelle.



Elegräk tä xäbär itelüençä, Başqortstanda moña qädär dä Estoniägä tiskäre mönäsäbät belderü oçrağı bulğan ide. Ufanıñ Dim rayonında Tallin isemle uram bar. Menä şul uramnıñ isemen üzgärtüne taläp itüçelär bar. Älege başlanğıçnı başqala deputatları da kütärep aldı. Alar bu mäsäläne üzläreneñ 17 mayda ütäçäk çirattağı utırışında tikşerergä kileşkän. Şulay itep yuqtan ğına başlanğan ğämällär zur säyäsätkä äylänep kitte.

Fänis Fätxi, Ufa

XS
SM
MD
LG