Accessibility links

шимбә, 3 декабрь 2016, Казан вакыты 07:50

Qazanda yaña transport çeltäre buldırıluı kiçekterelde


1 maydan Qazan citäkçelege, şähärneñ marşrut avtobuslarınıñ yöreşen üzgärtergä wäğdä itkän ide. Monı işetügä, xalıq “yä, Alla xäzer ostanovkalarda 40 minut torası, söyrälep yörgän pazik, ğazellärdä G xärefe kebek böklänep barası” bulmayaçaq dip, tämam şatlanıp, ciñel sulap quyğan ide. İrtäräk tınıçlanğannar şul. Xalıqqa yaz bäyrämenä digän büläkne, şähär xakimiäte, iyüldä genä yasarğa buldı. Yäğni avtobus marşrutlarınıñ yörü yulları 1 iyülgä üzgärteler dip kötelä. Şulay uq xakimiätlelär tizdän Qazanda 1100 iske avtobus yañağa almaşınaçaq,dip tä wäğdä itälär. Yaña maşinalar ekologik yaqtan çista bulaçaqlar. Tik menä yunle transportqa utırıp yörüneñ waqıtı çigerelüeneñ säbäpläre genä äytelmi. Şähär xakimiäte matbuğat üzäge,üz çiratında bezgä, bu mä’sälägä ällä ni iğtibar birergä kiräkmi, şuña kürä bez bu turıda söylämibez didelär. Annan soñ ber dä cawapsız qalmas öçen: Yaña avtobuslar qaytıp citmäde äle, iyül ayında şähärdä xalıq ta az, şuña kürä üzgäreşlär cäygä bilgelände, didelär.

Beräwlär öçen bu yañalıq puçtäk bulsa, ikençelärneñ yazmışların da üzgärtergä mömkin. Marşrut avtobusları xucaların diyuebez. Alar bu mä’sälägä ber dä bitaraf tügel. Şäxsi avtobuslarğa xuca Ğolnara şähär transportı ölkäsenä kеrteläçäk yañalıqlarğa menä bolay dip baya birde.

Zamanında şäxsi eşmäkärlär, üz aqça yuğaltudan qurkmıyça marşrut avtobusların başlap yörgännär, anı sistema däräcäsenä xätle üstergännär. Ä xäzer, türälär, bezneñ eşlärne üzeneke itep, bezne ipisez qaldırmaqçı bulalar.Bu ğädelsezlek. Xätta marşrutlarğa auksionnı ğına alıyq. Anı oyıştırğanda bezne bötenläy anda kertmädelär. Anda inde küptän böten marşrut satılıp alınğan ide. Alar bezgä avtobuslarnı yañartırğa üzläre litsenziä dä birmi. Näticädä bezneñ avtobuslar iskerä, sirägräk yulğa çığa. Axır çiktä barıdır xalıqqa naçar bulıp qala. Yäğni törle yullar belän bezne qısalar bu marşrut avtobus xucası Gölnara süzläre ide.

2нче ATP xezmätkärläre beldergänçä bügenge köndä Qazanğa 15 yaña avtobus qaytqan, alarnıñ 10 inde şähärdä yöri. Baştaraq bu ATPda 50 avtobus almaqçı bulğannar, läkin 25 kenä qaytarılaçaq, qalğannarı Tatarstan NEFAZları bulaçaq didelär bezgä 2нче ATPda. Yaña marşrut kertüne kiçek torunıñ säbäpläre isä, alarça, yaña avtobuslarnıñ qaytıp betmäwe belän bäyle. Şäxsi eşmäkär Ğolnara isä bu mä’sälägä başqaçaraq qarıy.

Bezgä qalsa, şähär yullarınnan ber-ike köndä genä, anıñ xätle küp marşrut avtobusların alıp atu, bu mömkin tügel. Annarı yaña avtobuslar şaqtıy qimmät. 2 ATP alğan dilär anda berniçä avtobus. Härberseneñ bäyäse yaqınça 2 million. Meñlägän mondıy avtobus alırğa xakimiät qayan aqça alsın.

Yaña transport çeltären açıp, sezgä eşlärgä mömkinlek birmägän oçraqta sez nişlärgä cıyınasız digängä, marşrut avtobusı xucası Ğolnara bolay cawap birde.

Tik torğannan bezne eşsez qaldırırğa, sızıp atırğa alarnıñ xaqları yuq. Yaña marşrut çeltären açıp alar bezne yuq itergä telilär. Bez üz mänfägatlärebezne, üz xoquqlarıbıznı yaqlayaçaqbız. Bu şäxsi eşmäkär Ğolnara fikere ide.

Äle qayberäwlär äytüençä, Rusiäneñ 3нче başqalası isemen ayularğa tırışqan Qazanda, yaña marşrutlarğa küçü, dekaber axırlarına xätle suzılırğa mömkin.

Ğädel Galämetdinov.

XS
SM
MD
LG