Accessibility links

җомга, 2 декабрь 2016, Казан вакыты 22:58

Tatarstannıñ “İdeyä” texnoparkı belän IBM şirkäte kileşü tözede


Soñğı yıllarda Tatarstanda iqtisadi üseşkä zur iğtibar birelä başladı. 2004 yıldan başlap, yaña texnologiälärne, biznesnı üsterü maqsatınnan, Qazanda "İdeyä" texnoparkı eşläp kilä. Bügenge köndä älege şirkät, Yevropada iñ zurlardan sanala. Anıñ mäydanında xäzer 28 inovatsion kompaniä eşläp kilä. Monnan tış texnopark urta innovatsiäle küp kenä başqa şirkätlärgä härdaim yärdäm itep tora.

Tizdän Qazanda, IT texnologik üzäk tä tözeläçäk. Bu mäs'älä buyınça kiñäşmä Tatarstannıñ ministrlar kabinetında ağımdağı yılnıñ 17 aprelendä uzğan ide. Näq menä şul waqıtta, bäygedä IBM “Könçığış Yevropa häm Aziä” şirkäte, Qazanda texnologik park tözergä röxsät aldı.

Şuşı könnärdä, Tatarstan başqalasında IT texnologik üzäk tözü niäte Germaniädä räsmi räweştä terkälde dä inde. "İdeyä" İnnovatsion-citeşterü texnoparkı" açıq aksionerlıq cämğiäte belän IBM ("Ay-Bi-Em") şirkäte arasında xezmättäşlek itü turındağı kileşü tözelde. Anı "İdeyä" texnoparkı general' direktorı Sergey Yuşqo häm IBM şirkäteneñ vitse-prezidentı saymon Porter imzaladı. Älege tantanada Tatarstan Premyer-ministrı Röstäm Miñnexanov qatnaştı.

Säfär barışında Premyer-ministr IBM şirkäteneñ Tikşerenü üzägendä buldı häm IT sistemalar eşlänmäse belän yaqınnanraq tanıştı. IBM mäğlümatı texnologiälär ölkäsendä dönyada iñ zur kompaniälärneñ berse. Biznes öçen innovatsion programmalar tözü buyınça älege şirkät inde 90 yıllıq täcribäse bar häm ul bu ölkädä aldınğı urınnarda tora. IBMnin barlıq proyektları, yaña buın biznesı häm yuğarı texnologiälärneñ barlıq östenleklären tulı räweştä qullanırğa mömkinlek birä.

Kileşü buyınça, IBM şirkäte yaqın arada yaña texnologiälär bazarın öyränep, marketing tikşerenülär ütkärü, Texnologik üzäkneñ biznes-planın häm üseş strategiäsen eşläw, texnopark tözeleşendä däwlät programmasın ütäw xoquqı aluğa ireşte. IT Texnologik üzäkneñ proyektın tormışqa aşıru eşe üz çiratında, “İdeyä” texnoparkına yöklängän.

Yaña Texnologik üzäk Qazanda ike mäydan da urnaşaçaq. Berençese Tatarstannıñ “İdeyä” yuğarı texnologiälär, ikençese “Ximgrad” industrial parkında bulır dip kötelä. Biredä ximiä häm nefteximiä ölkäsen üsterü maqsat itep quyıla. 2007-2010 yıllarda texnoparkqa bulğan investitsiälär yaqınça 6 milliard sum täşkil itäçäk.

“İdeyä” texnoparkı mäğlümat üzäge äytüençä, tizdän Qazan Texnoparkı belän IBM kileşüe turında, ike yaqtan da wäkillär qatnaşuında matbuğat oçraşuı bulaçaq. Şuña da, ike zur şirkät kileşüeneñ uñay häm tiskäre yaqları turında tulıraq, “Azatlıqnıñ” aldağı tapşırularında söylärbez.

Ğädel Galämetdtnov

XS
SM
MD
LG