Accessibility links

җомга, 9 декабрь 2016, Казан вакыты 12:59

Çallıda "Svastika eşe" buyınça mäxkämä utırışı uzdı


Çallıda faşistik oyışmalarnıñ buluı xaqında räsmi mäglümätlär yuq. Şulay da, şähärneñ tege yäki bu urınnarında faşist simvolı sanalğan svastikalarnı kürergä mömkin. Ğädättä alar cir astı yulları, iske yortlarnıñ diwarlarına sipterelä torğan buyaw belän yasalğan bula. Yäşlärneñ mondıy şayarularına qarata nindi dä bulsa çara kürüläre xaqında xäbärlärneñ işetelgäne bulmadı. Menä svastik belän bäyläneşle berençe cinayät eşe barlıqqa kilde häm anıñ qayber näticäläre inde bilgele. Waqiğanıñ başı bolay bula. Uzğan yılnıñ 20нче dekaberendä şähärneñ 54/04 yortında yäşäwçe tönge eştän qaytıp barğanda, kürşe podyezd qırında mäyet kürä häm militsiägä xäbär itä. Tikşerüçelär mondıy näticä yasıylar: ülüçegä 23 yäş, başına awır äyber belän suğudan yaqtı dönyadan kitep bara. Monıñ östenä, märxümneñ tänendä faşistlar bilgesenä oşağan simvollar, matbuğatta äytep bulmağan naçar süzlär dä tabıla. Üterüçelär kemnär, ni öçen märxümneñ tänenä oyatsız süzlär yazılğan, svastika yasalğan? Militsiä ber ay eçendä üterüçelärneñ ezenä töşä. Tikşerü kürsätkänçä, uzğan yılnıñ 20нче dekaberendä 54нче bistäneñ 4нче yortında ber-berse belän tanış bulğan dürt keşe araqı eçä başlıy. Nindider ber waqıtta alarnıñ berse üzen yämsez tota başlıy häm açuları çıqqan iptäşläre anı ayausız qıynıy başlıy. Canı çıqqan gäwdäneñ ayaq häm başqa öleşlärenä alda äytelgän bilgelärne yasıylar, süzlär yazalar. Annan soñ mäyetne, ezne yuğaltu öçen bulsa kiräk, yortnıñ işek töbenä çığaralar. Şuşı aralarda ğına üterüdä ğäyeplängän 3 keşegä qarata mäxkämä buldı. Älege mäxkämä eşe cämäğätçelekkä artıq bäyän itelmäde häm şaqtıy bilgesezlek astında ütte. Şulay da mäxkämä eşenä noqta quyılmadı häm näticädä xökem qararınıñ berençe öleşe cämäğätçelekkä dä bilgele buldı. Üterüçelärneñ ikesenä mäxkämä qararı belän 9ар yıl qatı rejimlı törmä bilgelänä. Ä menä mäxkämä ğäyeplänüçelärneñ 3-sen "zıyan kürüçene qıynawda azraq qatnaşa", digän fikergä kilä häm anı şartlı cäza belän irektä qaldıra. Läkin Çallı prokuraturası wäkilläre älege qarar belän kileşmi häm qararnıñ älege öleşen Tatarstan yuğarı mäxkämäsendä qabat tikşertergä cıyına. Şuşı eş mäxkämädä ğädäti üterü bularaq qına qaralamı, ülüçeneñ tänendäge svastika suräte, törle yazularnıñ nindi ısul belän barlıqqa kilüläre iğtibarğa alınamı? Mäxkämäçelär älegä bu sorawlarğa cawap işettermilär. Cinayät eşeneñ Qazanda däwam itelüe "Svastika eşe"nä yañalıqlar da kertergä mömkin.

Ğafiulla Ğaziz, Çallı

XS
SM
MD
LG