Accessibility links

якшәмбе, 4 декабрь 2016, Казан вакыты 03:00

Törek matbuğatında böten iğtibar saylawlarğa yünälde


Xakimiättäge “dini yünäleşle” Ğädälät häm qalqınu partiäseneñ ilbaşı namzäte, xärbilärneñ “kiräk bulsa qatışırbız” digän açıqlawı häm konstitutsion mäxkämä qararınnan soñ parlamentnıñ waqıtınnan elek saylawlar ütkärü qararına kilüe – cämäğätçelekneñ böten qatlamnarında, uramnarda, transportta, bazarda, mäydannarda bäxäsläşelgäne kebek törek matbuğatında da kiñ räweştä yaqtırtıla.

“Sabah” gazetı waqıtınnan elek ğomum saylawlar turındağı yazmasın “Demokratiya öçen äye” dip atağan. Gazet Törkiyä Böyek Millät Mäcleseneñ üzen tä’sirsez qaldıru tırışlığın buldırmawın häm parlament saylawlarınıñ 22 iyüldä ütkärelüe qararın utırışta qatnaşqan 458 xalıq wäkileneñ bertawıştan qabul itüen xäbär itä.

“Hürriyet” gazetı da: “Säyäsi partiälär esse cäy könendä saylaw marafonına çığa,” - dip añlatma yasıy.

Gazet “Eş dönyası waqıtınnan elek saylawlarğa söyende” isemle yazmasında isä tanılğan eşmäkärlärneñ: “Törkiäneñ yulı açıldı, böten taraflar da ber ük fikerdä, bilgesezleklär iqtisatqa tiskäre yoğıntı yasıy, Törkiyä ireşkän säyäsi häm iqtisadi totrıqlılıqnı saqlap qalu öçen bik möhim çişeleş yulı bularaq küräbez” räweşendäge fikerlären citkerä.

“Milliyet” gazetı isä “80 qaynar kön” isemle mäqäläsendä waqıtınnan elek saylaw qararı belän kierenkelekneñ kimüen belderä.

“Cumhuriyet” gazetı añlatması isä “Cäy urtasında saylawlar” räweşendä.

“Sabah” gazetı waqıtınnan elek saylawlar moxitına kerelüeneñ uñ häm sul yaqlı partiälär arasında berlek häm ittifaq urnaştıru ezlänülären barlıqqa kiterüen, Tuğrı yul partiäse belän Anavatan partiäseneñ, Cömhüriyät xalıq partiäse belän dä Demokratik sul partiäneñ berläşü söyläşülären ütkärüen yaza.

“Türkiye” gazetı: “İlbaşı krizisı belän başlanğan barış saylawlar waqıtı belän bette”, “Milliyet” gazetı “Törkiyä ciñel sulap quydı” dip yaza.

“Zaman” gazetı isä Konstitutsion mäxkämäneñ ilbaşın saylawnıñ berençe turın ğämäldän çığaruına qarata rizasızlığın belderep: “Ul çaqta Konstitutsion mäxkämä aşığıç räweştä xalıq tawışın da ğämäldän çığarsın,”- digän fiker belderä häm:

“Törkiyä, alğarışlarğa ireşep, dönya tigezlegendä üzen sizderä başlaw belän ildä säyer äyberlär bula başlıy häm il üz eçenä yabılıp qala. Xärbilärneñ açıqlawı, konstitutsion mäxkämä qararı häm başqalar digän çaqta Törkiäneñ tirä-yağında möhim häm kire qaytılmaslıq waqiğalar yäşänä,” – dip assızıqlıy.

“Parlamentta küpçelek tawışqa yä xakimiät partiäse kileşü ezlänüennän çittä torğan çaqta, töp oppozitsion partiya saylawlarnı konstitutsion mäxkämäneñ xökemenä tapşırdı. Bu waqiğalarnıñ näq urtasında ğomum ştab citäkçelege tön urtası belderüe belän demokratik barışqa qatışa aluda awırlıq kürmäde,” – dip yazuçı “Milliyet” gazetı: “Xäzer inde demokratiyanıñ iñ töp nigezenä möräcäğät iteläçäk, Törkiäneñ här poçmağın saylawlar ruxı çolğap alaçaq. Saylawlar ilne qaplap alğan ömetsezlek hawasın cäy yañğırı kebek tarqataçaq. Telägebez – ilebezneñ 21 ğasırda moña oxşaş krizisnı yäşämäwe,” – dip yaza.

Säğit Xäyri, Änkara

XS
SM
MD
LG