Accessibility links

Кайнар хәбәр

Mäğübä Sırtlanova häykälenä çäçäklär quyıldı


Oçuçı Mağübä Sırtlanova xezmät itkän 46нчы xatın-qızlar polkın faşistlar açudan “tönge ubırlı qarçıqlar” dip yörtälär. Çönki alar küp oçraqta tönnären oçıp doşmannarnıñ qoralları urnaşqan bazalarnı tar-mar itälär. Häm Mäğübä Sırtlanova alar arasında iñ batırlarınnan sanalğan. Düşämbe könne dä 52 gimnaziä işegaldında tatar xatın-qızı Mäğübä Sırtlanova xaqında küp matur süzlär äytelde. Uquçılardan Sırtlanova turında sorağaç, 9 sıynıfta belem aluçı Läysän Minnikaeva:

1912 yılnı Başqortstannıñ Bäläbäy şähärendä tua, Taşkentnıñ hawa yullarında texnik bula. 1935 yılnı oçuçı bula. Suğışnıñ berençe könnärennän ük soñğı qädär frontta bula. 782 xärbi oçış yasıy. Sovetlar Berlege qaharmanı, Lenin ordenı belän büläklänä.

Läysän Minnikaeva şulay uq 82 yılnı açılğan muzey eşçänlege turında söyläde:

Muzeyğa Mäğübä Sırtlanova turında xäbärlär cıyıla. Yıl sayın veterannarnı çaqırabız.

Kilgän veterannar isä Mäğubä Sırtlanovanıñ häykäle yañartılğan öçen xakimiät başlığına räxmätlären citkerdelär. İdel buyı rayonı başlığı bu häykälne şähär qaznası xisabına tügel, ä eşmäkärlär aqçasına tözekländerelgänen äytte. Başqortstanda tusa da, Mäğübä Sırtlanova suğıştan soñ Qazanda yäşi. Şuña älege 52нче gimnaziä yanındağı uramğa da anıñ isemen birgännär. Kübese anı bu oçraşuda da yaqtaşıbız dip söyläde.

Mäğübä Sırtlanova berdäm-ber Sovetlar Berlege qaharmanı isemen alğan xatın-qız. Ul doşmannarnıñ qorallı bazaların tar-mar itkändä, oçqıçın asqa qädär töşerä torğan bula, bombalarnı qul belän atqanda tögäl urınına barıp töşsen öçen.

Cıyında isä Sırtlanovanıñ batırlığı bügen küp kenä üsep kilüçe buınnarğa ürnäk dip bilgeläde veterannar. Läkin muzee urnaşqan häm işegaldında häykäle quyılğan 52 gimnaziädä dä äle batırlıq eşlägän bu xanım turında uquçılarnıñ siräge genä belän tösle toyıldı.

Landış Xarrasova

XS
SM
MD
LG