Accessibility links

җомга, 9 декабрь 2016, Казан вакыты 03:11

Tatar kongressında çit ildän kilgän veterannar belän oçraşu uzdı


Veterannar – barlığı 12 keşe tarixi watannarına Qazanda uza torğan 9 may bäyräm çaralarında qatnaşırğa çaqırılğannar. Şulay uq alar 10 köne buyı “Livadiä” kunakxanäsendä dä yal itäçäk. Qazanğa Äzerbäycan, Qazaqstan, Qırğızstan, Latviä, Moldova, Ukraina häm Üzbäkstannan millättäşlärebez kilde. Alarnıñ kübesenä 80 yäştän artıq. Şundıy zur yullarnı uzıp kilü säbäpleme, Tatar kongressında çäy östäle artında uzğan oçraşuda alarnıñ härqaysı üzlärendäge milli tormış turında küpläp söylärgä tırıştı. Qırğızstannıñ Bişkäk şähärennän İdiät Töxvätullin:

Üzebezneñ tatar-başqortlarınıñ sorawların da alıp kildem. Din belän tatar telen nığıtırğa kiräk. Yäşlärne cibäräbez qazanğa küpläp uqıtırğa. Annarı üzebezdä tatar mäktäplären açarğa ide.

İdiät Töxvätullin Qırğızstanda elek 75 meñ yäşäsä, xäzer 26 meñ qaldı, küpläre Rusiägä kittelär dide. Oçraşu waqıtında tatar kongressı citäkçese Rinat Zakirov:

Törle BDB illärendä yäşäwçe millättäşlärebezgä däwlät programması nigezendä Tatarstan bistälärenä, awıllarına qaytıp urnaşırğa mömkin. Moña tatar kongressı quldan kilgänçä yärdäm itäçäk.

Rinat Zakirov inde küçenep qaytırğa teläp xat cibärüçelär barlığın da äytte. Rinat Zakirov:

Semipalatnıñ tatar oyışması citäkçesennän küçenep qaytırğa telägän 31 keşeneñ isemlege kilde. Anda barısınıñ da hönärläre, yäşläre yazılğan. Bez kiläçäktä alarnı urnaştıru cayın qarayaçaqbız.

Tatar kongressı räise Rinat Zakirov bu programmağa aqça federal' qaznadan bülenäçägen äytte. Läkin inde küp yılların çittä uzdırğan ölkän millättäşlärebez qaytırğa bik aşqınuların kürsätmädelär, möğayın bu programma kübräk yäşlärne qızıqsındırır. Şul ul Bişkäktän İdiät Töxvätullin:

Ğömer buyı yäşägän cirdän tiz genä küçenü awır ul. Bez äle ğöref-ğadätlärebezne saqlap kiläbez.

Oçraşu waqıtında millättäşlärebezneñ qayberläre üzläreneñ zarların da belderdelär. Mäsälän Qazaqstannıñ Cayıq şähärennän kilgän veteran Rafael' Ğaliullin:

Tatarstannan kilgän cırçılar konsertnı barı tatarça ğına başqarsınnar ide.

Ägär Tatar yäşläre oçraşuları küpçelektä rusça uzsa, veterannar barı tatarça ğına aralaştı.

Landış Xarrasova

XS
SM
MD
LG