Accessibility links

Кайнар хәбәр

Britaniä: Blair 27 Yündä wazıyfasınnan kitäçägen belderde


10 Mayda Britaniä premier-ministrı Tony Blair Yünneñ 27sendä wazıyfasınnan kitäçägen iğlan itte. Xakimiättäge Leyboristlar partiäse xäzer yaña citäkçe saylarğa tieş bulaçaq. Ul - finans ministrı Gordon Brown bulır dip kötelä. Saylanğan oçraqta Brown Britaniäneñ yaña premyerı bulaçaq.

"Bügen min Leyboristlar partiäse citäkçese wazıyfasınnan çigenü qararımnı iğlan itäm. Partiä yaña citäkçe saylayaçaq. Yünneñ 27sendä min premyer-ministr wazıyfasınnan çigenü ğarizasın patşabikägä tapşıraçaqmın" dide Britan premyer-ministrı.

Şuşı belderüen Tony Blair bügen Angliäneñ tönyağında üze saylanğan Sedgefield bülgesenä barıp yasadı. Monnan irtäräk ütkän xökümät utırışında ministrlarnı mädxiä uqımasqa soradı. "Anısın başqa köngä qaldırıyq" dide ul. Şulay da, Blair urınına basır dip kötelgän finans ministrı Gordon Brown, anıñ "partiä, Britaniä häm dönya belän idarä itüdä zur uñışların" telgä almıy buldıra almadı.

10 yıl buyı xakimiättä torğan däwerendä Blairnıñ uñışları da yuğaltuları küp buldı. Bügen ul monı üze dä tanıdı şikelle.

"Min bu ilneñ premier-ministrı bulıp 10 yıl eşlädem. Bügenge dönyada bu şaqtıy ozaq waqıt, minem öçen dä, häm bigräk tä, il öçen. Qaywaqıtta, xakimiät tartımınnan qotılu öçen berdän-ber yul – annan kitü" dide Blair.

Blair citäkçelegendä Leyboristlar partiäse 1997, 2001 häm 2005 yıl saylawlarında ciñügä ireşte.

Blairnıñ berençe möddätendä ük berniçä uñışlı adım yasaldı. Angliä bankına kredit protsentların bilgeläwdä ireklek birelde. Şaotlandiä belän Wales cirle xökümätlär tözi aldı. 1998 yılda Blair İrlandiä premier-ministrı Bertie Ahern belän uñışlı söyläşülär ütkärep Tönyaq İrlanidädä tınıçlıq urnaştıru mäsäläsendä kileşügä ireşte.

Ä menä Ğiraq suğışı Blairnıñ abruyına zur zıyan kiterde. Anıñ Buş säyäsätenä quşıluı kisken tänqitkä tartıldı. Bar Britaniä buylap qarşılıq çaraları ütte. Alay da bügenge çığışında Blair ul adımın yaqlap çıqtı:

"Saddamnı häm ulların, Talibannı bärep töşerü, çağıştırmaça ciñel buldı, läkin terrorçılıq häm anı yaqlawçılar arqasında – yuğaltular artıq zur häm qimmätkä töşte. Küplär şulay uylıy. Läkin minemçä, bu eşne axırına citkerü kiräk" dide Blair.

Üzeneñ çığışın Blair bolay beterde:

"Britan xalqına, uñışlarım öçen räxmätemne belderäm, uñışsızlıqlar öçen ğafu ütenäm. Uñışlar sezgä" dide Blair.

Wazifasınnan çigenäçägen beldersä dä Blair äle aydan artıq urınında qalaçaq. Yün ayında ul Germaniädä Zur 8-lek oşraşuında häm Yewropa Berlege sammitında qatnaşır dip kötelä.

Ali Ğilmi
XS
SM
MD
LG